Makapa-in-love

Gibati ni Vincent ang dili basta-basta nga kakulba dihang nakita niya nga diriyot g’yud madam-agi sa kusog nga nagdagan nga sakyanan ang usa ka babaye nga naglakaw didto sa eskena Escario ug Gorordo Avenue.

Naglumbaanay man gud diay ang mga drayber sa duha ka passenger jeepneys nga tingali nag-ilogay og pasahero.

Samtang ang ubang drayber sa PUJ kalma ra kaayo nga nagpadagan apan kadtong mga duha ka drayber daw walay mga buot nga naglumbaanay sa gamay nga karsada.

Napahit ni Vincent ang iyang wait sa kalagot ug nakahuna-huna nga tukma g’yud ang gihimo sa Land Transportation Office nga usahay pakalitan og drugtest ang mga drayber sa mga PUJ ug taksi kay daghan kanila mga adik-adik.

“Hapit ka g’yud mabag-iri adtong usa ka PUJ miss. Gamay na lang g’yud kaayo ang kuwang,” giingnan ni Vincent ang babaye dihang iya kining giduol. Daw nangluspad usab ang babaye sa kakuyaw. Wala dayon kini makatingog.

“May gipangita man gud ko nga balay dinhi sa Escario mao nga wala ko makabantay niadtong mga sakyanan nga naglumbaanay,” sa babaye pa. Nahibaw-an ni Vincent nga gikan diay sa probinsya ang babaye – si Lynlyn.

Sanglit wala man magdali si Vincent, miboluntaryo siya nga tabangan si Lynlyn pagpangita sa balay nga iyang gipangita. “Among silingan didto sa lungsod sa Ronda ang tag-iya sa balay ug anha usa ko moestar sa ila,” pasabot ni Lynlyn kang Vincent.

Miabot na lang sila sa duol sa Kapitolyo pagpinangita apan wala gayud nila kini makit-i. “Mag-snack usa ta Lyn kay nasayod ko nga gigutom ka na pagsigi’g lakaw,” giingnan ni Vincent si Lynlyn.

Si Vincent na lang gani ang mibitbit sa bag sa dalaga. “Basin duna kay lakaw, ako na la’y bahala kay malangan ka na,” giingnan ni Lynlyn si Vincent. “No, dili tika biyaan kay wala ka ra ba’y kaabtan dinhi sa siyudad. Kon mogabii na gani nga dili nato makita, adto lang ta sa balay ug ugma na nato ipadayon ang pagpangita,” dali nga tubag ni Vincent.

Gipasabot ni Vincent si Lynlyn nga duna siya’y manghod nga dalaga ug sila la’y magtupad paghigda sa kwarto. Nabantayan ni Vincent nga nakapahiyom si Lynlyn.

Wala gayud nila makita ang balay nga gipangita ni Lynlyn. Kilum-kilum na mao nga misakay na lang sila og PUJ paingon sa Busay. Natingala ang inahan ni Vincent nganong may kauban siya nga babaye sa pag-abot sa balay. (Sumpayan)