Deposito

CEBU, Philippines - Money is not the Most Important thing in the world. Love is. Fortunately, I love Money. (Jackie Mason)

Paspas ang lihok ni Inting karong buntaga. Kinahanglang maablihan dayon niya ang tindahan nga gipatigayon niya sa lungsod ning sayong kabuntagon. Angay lamang nga doblehon niya ang iyang paningkamot kay mabdos ra ba si Nita ug talianak na. Mao nga halos ang gabii himuon niyang adlaw sa bisan unsang matang sa negosyo nga mosulod sa iyang hunahuna.

Ang mahinungdanon duna gyud siya’y ikadeposito sa bangko. Kinahanglan mosaka ang iyang pundo. Kinahanglan gayud! Ang iyang hunahuna, walay pagkutat diha sa pagkwenta sa hustong kantidad sa iyang deposito.

As of June 7 ang tanan mikabat na og 543,000 ka pesos! Nagmabungahon gyud ang iyang paghago ug pagsakripisyo.

Bililhon ang kwarta! Ug kay bililhon man, angay kining pangitaon tumpi-tumpion. Tungod niini nahimong stressful kaayo ang iyang kinabuhi. Kayud diri, kayod didto hangtud nga dili na hinuon sila magkakuyog ni Nita sa pagpanimba nga unta aktibo man siya sa kalihukan sa BLD sa ilang parokya.

Mao nga si Padre Arthur ang mangita gayud kaniya sanglit managhigala man sila. Apan lahi na si Inting karon kay bisan ang Domingo tilokon gyud. Ang anaa sa iyang hunahuna ug pagbati kwarta! Ang kwarta! Kabtangan! Bahala na og below sa minimum ang iyang isuhol sa iyang mga tawo ug pasud-anon lamang sila og mawos nga ginamos. Ang mahinungdanon makasapi gyud siya pinaagi kanila! Mao nga panagsa ra gyud ang withdrawals sige na lang deposits.

Naputol ang iyang paghanduraw sa dihang iyang nakita ang kagubot nga nahitabo sa iyang tindahan. Adunay sunog! Unsaon na lang ang iyang napondar! Nagdali siyang nanaog sa iyang gisakyang multicab ug midali pag-adto sa iyang pwesto.

Salamat na lang kay anaa ang iyang mga tawo nga nanalipod sa iyang tindahan. Giguba nila ang mga gripo ug gipabaha ang tubig nga maoy nakapakgang sa wala kaayo kadako nga kalayo. Dinhi nahinumdom siya nga dili diay sa tanang higayon bililhon ang salapi. Anaa pa diay ang gugma ug pagpakabana.

Daw sa nakaamgo siya sa iyang dakong sayop. Ug dili pa ulahi ang tanan aron iyang tul-iron ang iyang hiwi nga binuhatan. Bahala’g mawala ang tanan basta dili lang mga tawong nahimong kabahin sa iyang panaw uban ni Nita, iyang kapikas, ni Dodong David iyang anak ug sa mga tawong nisakripisyo usab aron siya molambo. Sila ang iyang tinuod nga bahandi.

May happiness touch your life today as warmly as you have touched the lives of others. (Rebecca Forsythe)