Man hater

Si Allan midali pagkawhat sa iyang itom nga backpack nga didto sa ulahing lingkoranan sa sakyanan. “May white flower akong dala,” giablihan sa ulitawo ang siper sa bag. May gikuot ug wala madugay nadala sa iyang kamot ang gamay’ng garapa sa tambal ug gitunol ngadto sa dalaga. Nahulog gikan sa bag ang usa ka plastik nga gisudlan og gapas. Gidali kini pagpunit sa ulitawo ug giuli ngadto sa bag nga wala mamatikdi ni Salie. “Biya-i na lang ko,” miingon ang dalaga, “kuhai’g hulagway kadtong patay’ng lawas sa babaye.”

Pagtalikod ni Allan gibuksan niya ang garapa. Nagbutang siya’g diyotay sa maong tambal sa iyang kamot ug gipahid kini sa iyang ilong. Nakabatyag siya og kahalang.

Pagkilab sa pipila ka gutlo, inanay nga naulian si Salie. Gikawhat niya ang iyang bag ug gikuha ang cellular phone nga gipagamit kaniya sa publikasyon. Gitawgan niya si Mr. Suarez. Gisuginlan niya ang editor sa nahitabo sa ilang lakaw-ang mahitungod sa patay’ng lawas nga ilang nakaplagan sa bakanteng lote. Giingnan siya sa editor nga iyang kuhaon ang tanang mahinungdanong mga kasayoran bahin sa pagkamatay sa biktima. Mao pa gayo’y iyang pagpalong sa cellular phone dihang nakadungog siya’g mga tunob nga nagpaingon sa iyang nahimutangan. Milingi siya. Maoy iyang nakita ang usa ka polis nga miduol kaniya. Gisusi niini ang iyang kahimtang. Nagpaila kini sa ngalan nga Chief Inspector Yuri Cuyos. “Salie Valle,” paila usab sa dalaga sa iyang kaugalingon dihang gilamano siya niini. Nabatyagan niya ang kainit sa palad sa lalaki. Gikuha niya’g dali ang iyang kamot.

Mibathay sa panagway ni Yuri ang usa ka mahigalaong pahiyom. Napugos usab pagpahiyom si Salie. Sa hilom nahibulong ang dalaga sa iyang kaugalingon. Iyang namatikdan nga gaan ang iyang pagbati ngadto sa lalaki. -- Sumpayan pa