Two Lovely Flowers

Gula 4

Gisugat ni Renan si Clarissa, apan wala niya tuyoa nga ang iyang panan-aw didto usab gipunting sa kauban niini nga maanyag nga babaye.

“Ako diay kining manghod Renan. Siya si Marife nga usa ka nurse sa Cebu Doctors Hospital ,” gipaila ni Clarissa ngadto sa iyang hinigugma ang kauban niini nga gwapang babaye.

Gilamano ni Renan si Marife. “Pulos g’yud mo mga gwapa no? Dili g’yud maglagyo ang inyong panagway.” Miipon sila sa ubang mga bisita apan taud-taud gidala ang magsoon ni Renan sa balkon sa taas.

“Moadto usa ko sa CR kadiyot Renan,” nananghid si Clarissa. Sila na lang si Marife ug Renan ang nahabilin sa balkon. Wala tuyoa ni Renan nga gibati usab siya’g kaibog sa manghod sa iyang hinigugma.

“Kumusta Mar, wala diay nimo dad-a ang imong boyfriend?” ni Renan pa nga mihimo og pasakalye. “Wa pa ko’y boyfriend uy. Gusto ko nga pareho ni Ate makakita ko’g buotan ug gwapo sama nimo,” ni Marife.

Gipangayoan ni Renan og contact numbers si Marife. Gi-miss call niya ang numero sa dalaga nga mi-save usab dayon sa iyang numero. Nahilom sila kay nagdanga-danga na sa ilang nahimutangan si Clarissa.

Nanglabay ang mga adlaw. Kanunay’ng nakigbayloay og text messages si Renan ngadto sa magsoon. Hangtud nga usa ka gabii, nakadawat si Renan og text message gikan ni Marife.

“Renan pwde k nimo ubanan sa party sa akng barkada ky ako ra’y way partnr. Sila dunay mga boyfrind,” ni Marife pa. Wala pakyasa ni Renan si Marife. Sa party, wala magtoo si Renan kay tsansing kaayo niya si Marife. Nag-inom sila og beer hangtud nga ingon sa nahubog ang dalaga.

Dihang daw nalipong na si Marife, misugod na kini paggakus-gakus ni Renan. “Mora mi’g sweethearts no?” giingnan ni Marife ang iyang mga higala.

“Tana, ihatud na tika sa inyo Marife kay mora’g nakainom ka na,” matud ni Renan.

Nagbuwag-buwag ang mga barkada ni Marife. Giagak ni Renan si Marife paingon sa giparkingan sa iyang sakyanan. Pwerteng nakagakus ni Marife sa ulitawo.

Sulod sa kotse, mopadagan na unta si Renan dihang gigunitan ni Marife ang iyang kamot. “Ayaw usa ko ihatud Renan, manuroy usa ta,” sa dalaga pa nga mihapohap sa nawong sa ulitawo.

Nakagusto si Renan sa gihimo ni Marife apan diha sa iyang huna-huna nga manghod kini sa iyang hinigugma. (Sumpayan)