Man hater

“Tungod sa nahitabo sa among pamilya,” tubag ni Salie nga nakahukom nga si Allan iyang tug-anan ngano nga nasilag siya sa mga lalaki. “Tungod sa mga lalaking wala’y baroganan naalaot ang mga mahal ko sa kinabuhi.” Wala makatingog si Allan. Midiyong lamang ang iyang mga mata nga mitutok kang Salie. Apan mipakita siya og kaikag sa gisulti sa dalaga. Dugay nang natanom sa iyang kasingkasing, misugilon si Salie ngadto kang Allan, ang kasilag sa mga lalaki. Si Papa mibiya kanamo kay nakigluon sa iyang kerida. Gikaguol ni Mama ang gibuhat sa among amahan. Nagpasagad na siya sa iyang kaugalingon. Dili na ganahan mokaon. Ug kanunay na lang kini nga naglublob sa kuwarto. Hangtod nga usa ka adlaw niana tungod sa gibating kaguol miinom kini’g hilo ug patay na dihang among nasudlan sa iyang kuwarto.”

Tungod sa nahitabo sa ilang pamilya ug sa ubang pamilya usab nga naungkag ang malinawon nga pagpuyo, nakulit sa pangisip ni Salie ang kayugot ngadto sa mga lalaki-- lakip ang iyang amahan. Nawad-an siya’g pagsalig sa tanang mga kaliwat ni Adan. Nahimo siyang man hater. Dili siya palupig sa mga lalaki diha sa mga lantugi. Dali rang mag-init ang iyang buot kun masaghiran siya’g lalaki.

Ang pagtaliwan sa ilang inahan nagbilin og masakit nga kahaw-ang sa balatian ni Salie. Apan wala siya paluba sa mga kasakit. Nahimungawong siya nga nagkinahanglan pa si Suzette sa iyang pag-atiman. Siya ang mibanos sa kaakohan nga gibiyaan sa ilang mga ginikanan ngadto sa iyang manghod. Gipatungha niya si Suzette. Nagtrabaho na siya niadtong higayona sa Sunlight Publishing, Inc. May kasaligan na siyang kinitaan nga makasapal sa ilang panginahanglan ug balayranan ni Suzette sa tunghaan. Malipayon sila sa ilang pagpuyo bisan wala na ang ilang mga ginikanan. -- Sumpayan pa