Mata sa kasingkasing

“Mamauli na ta,” giingnan ni Angeline si Vera. “Ngano gud,” nakugang si Vera. “Wa pa gani magsugod ang program.”

“Kalit lang naglain ang akong lawas. Kun dili ka pa mouli mouna na lang ko nimo.”

“Sige, sige...mamauli na lang ta.

Nanggawas dayon sila sa grandstand. Nanakay dayon sila’g traysikol balik sa boarding house. Sa hilom ingon sa naibtan og tunok si Angeline kay nakalikay gihapon siya ni Erik. Pag-abot sa weekend, midalikyat si Angeline pagpauli sa ilang lungsod sa Danao. Gimingaw na siya sa iyang mga ginikanan ug igsuon kay taudtaud na siyang wala makaduaw kanila. Sa nakalabay gud nga mga adlaw pulos bahin sa pagtuon ang iyang gihikutar.

Paghunong sa bus nga Saint Jude nga iyang gisakyan tungod sa Danao Public Market mikanaog si Angeline. Gikan dinhi mosakay pa siya’g habalhabal paingon sa ilang barangay. Mipaingon dayon siya sa terminal sa mga habalhabal. Maoy iyang nasakyan ang habalhabal ni Christopher, ang kanhi niyang boyfriend. -- Sumpayan pa