May valentino na, may abogado pa

Tigsayo gyud og tambong si Atty. Ritchie Tibon sa husgado. Alas otso y media naa na siya. Iyang tuyo aron makalikay sab siya’s daghang paper works sa iyang bupete. Ganahan sab siyang maghuwat sa huwes. Kay modalikyat pa man og toon sa iyang kaso. Naglingkod na siya sa usa ka lingkuranang gitagana sa mga abogado.

Gibasa niya ang kalendaryo sa mga bistahunong kaso karong buntaga. Ikalima iyang kaso nga collection of sum of money. Human na siya’g presentar sa iyang mga testigos. Mo-offer na lang sa siya sa mga documentary evidence. Unya may ngalan nga nakadani sa iyang pagtagad nga nabasa niya sa kalendaryo. People of the Philippines, plaintiff versus Gingging Gonzaga, accused, for violation of BP 22, for arraignment. Nakapanglingi siya sa luyo. Kay gipangita niya ang babaye nga nahimong akusado. Apan siya pang usa sulod sa husgado nga air conditioned.

Sa hayskul pa si Ritchie, nasilingan ug na-school mate niya si Gingging sa baryo Juayna ning dakbayan. Unya pagradwar ni Ritchie, namalhin sila’g puyo sa siyudad sa Bogo kay nabalhin og assignment iyang mga ginikanan nga puro magtutudlo sa saring publiko. Si Gingging maoy unang babaye nga iyang gipangulitawhan. Apan wa niya masuta kun gisugot ba siya o wa. Pero mora’g MU na lang nahitabo kay sukad adto, kuyog-kuyog na man sila nga holding hands. Unya loving kaayo sila. Wa na lang hinoon sila’y contact sukad nagkalagyo.

Nagpatudlo pa gani siyang Edwin, iyang ig-agaw nga dakong pagkamaguwang kun unsaon pagpangulitawo. “Ingna ani “Ging, naa unta koy isulti nimo. Kun mangutana siya unsa man? Imo sab siyang sukton, di kaha ka masuko? Ug moingon siya, di man, basta di lang binuang. Magpahadlokhadlok o gikulbaan kintahay ka. Unya moingon, ah basi’g masuko ka. Kun moingon gani siya, di lagi. Sultihan na gyud nimo nga “I love you” “Nahigugma ko nimo” “Gihigugma ko ikaw” Pili lang kun unsaon nimo pagsulti.

Nakasulti gyud si Ritchie. Bisa’g nagkurog. Apan lain iyang gigamit nga pulong. Kay hilasan siya sa mga pulong sa gugma nga laglom o tiniguwang. Giatol niya nga nagkuyog sila’g pauli gikan sa eskuylahan. Dihang duol na sila sa balay ni Gingging, nalitok gyud ni Ritchie nga “Naibog ko nimo, Ging”. Ug mitubag si Gingging nga “Unya nalang kay gitawag na kong mama” dayong dagan pauli sa ila. Sa sunod nilang kita, sweet na dayon sila.

Lahi na karon. Kay napulo ka tuig na ang nilabay. Wa gani nasayud si Ritchie kun minyo na o daga pa ba si Gingging. Ulitawo pa siya. Kay wa pa kakita’g sama kang Gingging.

Niigot ang pultahan sa husgado. Timailhan nga may niabli. Nilingi si Ritchie aron pagtan-aw kinsay nisulod. Nakita niya nga namatured og nanambok og diyutay si Gingging. Apan lutaw gihapon iyang kandiis sa bugol niyang aping. Ug pino gihapon siya’g kutis. Nitindog si Ritchie aron pagsugat sa babaye. “Ritchie? Ikaw?” ni Gingging. “O. Ako Ging. Kumusta na man ka?” ni Ritchie. Gigunitan ang tuong kamot sa higala. “Nia. Nakasohan og BP 22. Kay bisa’g mangutang og ginamos paisyuhon og tseke” ni Gingging. “Komedyante lang gyud gihapon ka. Minyo na ka?” ni Ritchie. “Wa pa gyu’y nasaag. Ikaw?” ni Gingging. “Nagpaabot lagi ko nimo” ni Ritchie nangluspad. Nanglipaghong si Gingging. “Naa baya si papa’g mama sa gawas” ni Gingging. “Maayo hinuon. Kay manuhod ko nila” ni Richie. Ug nitulo ang luha ni Gingging sa kalipay. Nigakos sa ulitawo. Naggakos sila. Hugot. Di lang may Valentino na si Gingging, may abogado pa gyud.

Ug nasayran ni Ritchie nga ang kaso ni Gingging namugna dihang napugos siya’g panghuwam og lending dihang nasakit iyang mama. Ug kining nalambigit sa kaso, kataposang tseke sa installment nga P20,000 na lang. Nga tungod sa kaapeke niuntol gyud kay wa napunduhi ang maong tseke. Giareglo ni Ritchie ang maong kaso. Nangalipay ug mapasalamaton kaayo ang mga ginikanan ni Gingging.

Ug pagkanaug nila sa husgado, nadungog nila ang awit ni Jose Feliciano nga nag-ingon Love comes from the most unexpected places. (Katapusan) (Sa magbabasang gusto’g libreng konsulta, dad-a ning pahina sa opisina sa tagsulat. Iatol og Sabado sa buntag)