Bag-o sa trabaho

Tsok! Tsok! Tsok! Tosak! “Tsok! Tsok! Tsok! Tsok!” May nagtingog sa ilawom dapit sa ligid sa atras sa pagdayong hunong sa dyip depasaheroan akong gisakyan, tungod sa USC Talamban Campus. May nanganaug nga upat ka mga pasahero. May nanakay sab nga upat ka estudyante.

Naa ko maglingkod dapit sa toong laray sa mga lingkuranan. Ikaupat ko nga pasahero nga naglingkod gikan sa pultahan sa dyip. Niarangkada ang sakyanan. Nawala ang tingog. Tungod sa Country Mall, nihana na sa’g hunong ang dyip. Ug nibalik ang tingog.

“Unsa man rong nagtingog, Dong?” sukot nako sa konduktor nga nagkapyot sa may pultahan.

Unya nagtan-aw lang sa unahan. Nipasiklap lang siya nako’g gamay. Unya wa nagtingog. Niurong ang sakyanan. May nanganaug. Nanawat og plete ang konduktor. Nanukli.

“Wa ba roy delikado, Dong?” dugang nako.

Nipadagan na sab ang sakyanan. Wa gihapon nitingog ang konduktor. Gibati hinoon ko’g kabalaka. Kay basi’g madisgrasya mi o maaberya ba hinoon.

Alas siyete sa buntag nisakay ko sa maong dyip sa Tintay Jeep Terminal sa Talamban. 13C ang rota sa maong dyip. Dose-dose ang kargang pasahero sa tuo ug wala nga habig sa mga lingkuranan. Puno sa mga pasahero. Duna unta koy sakyanan. Apan may problema sa mga ligid. Duha ang gitauran nag interior. Unya matag karon ug unya ma-plat. Hapit kada semana ma-plat. Kay bisa’g dili pa hilis, may mga liki ang mga ligid. Usahay distansiya la’g usa ka adlaw. Hasol kaayo’g maplatan kay wa koy tarong jack 6-tonners nga hydraulic akong jack. Apan di kadaug sa Isuzu Crosswind. Makahuwam lang ko usahay og mechanical jack nga para sa multicab. Mas maayo pa ang mechanical jack. Makadaug pa sa akong sakyanan.

“Pag-commute na lang, Dong ngadto sa imong seminar. Kay basi’g ma-plat unya ang ligid sa parkingan. Tagbaw na sab ka’g ilis,” ni Almira akong kapikas paghuman nako’g pamahaw ganiha.

Duna koy tambongang seminar sa mga Accountant sa Grand Convention Center sa di pa moabot sa Ayala Business Park.

“Mao bitaw akong plano” tubag nako. “Aron di ko mapugos og panuhol og tawong kusugkusugan nga mogamit sa tirings ug jack,” dugang nako.

Kasagaran manuhol na lang ko kun ma-platan. Aron di ko magkabuling o matumog sa singot.

Kining tagsa na lang ta mosakay og depasaheroan, mora na hinoon ta’g ignorante. Kay mora’g nilutaw ko nga ignorante alang sa mga pasahero nga kasakay nako. Kay ako ra may nireklamo nga dunay nagtingog ang sakyanan. Namid-ok lang ang konduktor nako.

Pagtungas sa dyip sa flyover tungod sa dalan San Jose dela Montana/Juan Luna, nagkakusog ug nagkasagidas ang tingog nga tsok-tsok-tsok-tsok-tsok-tsok dapit sa walang ligid sa atras.

“Di kaha ta madisgrasya ani Dong? O maabiriya ba kaha?” sukot lang gihapon nako. Bisa’g wa ko paminawa. Gihugtan ko na paggunit ang gunitanan.

Paglugsong sa fly over, kalit lang “KRASH. BLAG. PLOK. EEEEEEKKKK”. Nihagsa ang sakyanan. Pwerte nakong kurata. Nasangyad ang ihi sa wala nga atras. Naniyagit ang mga babayeng pasahero. Niikis ang sakyanan nga niaginod paubos sa flyover. Natangtang diay ang walang ligid sa atras. Nikagis sa karsada ang ihi nga nagdapat na niini. Nagsigi lang ko’g gunit og hugot sa akong gigunitan nga tubo. Wa gyud kaayo ko natandog.

Niurong ang dyip sa tuong habig sa karsada atbang sa B.I.R. Nanganaug ang tanang pasahero. Way namayad og plete. “Wa man nimo ayoha’g hugot ang mga nuts sa ligid!” singgaak sa drayber ngadto sa konduktor. Wa gihapon nagtingog ang konduktor. Nangluspad ug gipaningot. Sa akong nasayran sa pagpinaminaw nilang duha nga nagbayloay sa pagbasolay, puro sila bag-o sa trabaho. Bag-o ang drayber. Maong way tagad sa nagtingog sa iyang sakyanan. Bag-o ang konduktor ug maulaw moangkon nga bag-o. Maulaw moangkon nga dili insakto iyang trabaho. Nag-ilis diay og ligid ang konduktor didto pa sa terminal.

Nilili ko akong relo de pulso. Minus kinse na lang para alas otso. Dili pa ko ma-late. Duol na man lang ang Grand Convention. Maglakaw na lang ko. Nikoot kog duha ka singko pesos nga coin sa akong bulsa. Gitunol ko sa konduktor.

“Ay la’g plete, sir” niya pa. Dili katan-aw nako. Nagsigi’g tan-aw sa sawog. Samtang ang drayber nibiya kay nangita og ligid. (Katapusan)