Sulagma nga Deyt - Gula 3

“Dinhi diay sa Davao magtrabaho ang imong maguwang kaniadto?” matud ni Camela sa dayon niining tungab sa botelya sa softdrink.

Taud-taud, dunay usa ka customer sa kan-anan nga mikanta. Dili kaayo kini maayo nga mokanta mao nga naikag sila si Camela ug Narding pagkanta. “Sige na Narding, mokanta man kaha ka, kanta na,” giingnan ni Camela si Narding.

Wala magduha-duha si Narding pagkanta. Ang tinuod daan na nga tigkantahan si Narding kaniadto sa amateur hour sa radyo nga sagad ipahigayon sa Fuente Osmeña.

Nabantayan ni Narding nga mipahiyom si Camel nga naminaw sa iyang pagkanta sa “Isang Saglit.” Gisundan ni Narding sa “That Wonderful Sound” ug misamot nga mipakpak na g’yud si Camel.

“Ikaw na ‘sab Camel, ako na ‘say maminaw nimo,” giingnan ni Narding si Camela. Wala mosipyat, nahurot ang dayeg ni Narding kang Camel nga miawit sa “A Very Special Love.”

Hasta ang babaye nga tag-iya sa kan-anan klaro kaayo nga midayeg sa estelo nila sa pagkanta. “Pun-i pa ninyo’g kanta sir, ma’am, ako ra’y mobayad.” Sa laktud lingaw kaayo sila si Camel ug Narding.

Mga alas dies na sa gabii sila nga migawas sa kan-anan. Manuroy ta sa plaza dinhi sa Davao puslan man nga wala ta makalarga, magpahimulos ta’g suroy-suroy,” matud ni Narding.

Nagtupad sila paglingkod sa plaza, apan dili kaayo dikit. “Asa man ko matulog karon inigbalik nato sa kwarto nga usa ra may higdaanan didto?” nakahinumdom si Camel sa ilang kahimtang nga miabang og usa lang ka kwarto.

Wala dayon motingog si Narding. Taud-taud. “Sige, ikaw na lang sa kwarto adto lang ko magpaabot inigkabuntag sa lobby sa lodging house,” ni Narding pa nga daw nakapakonsyensya sa dalaga.

“Ayaw uy, ikaw ang mobayad sa kwarto unya naa ka sa gawas,” ni Camela pa. Hangtud nga mitanyag si Narding nga sa sawog na lang siya matulog ug si Camel ang mohigda sa higdaanan.

Mingaw na ang palibot sa plaza. Duhay usa ka paresan sa babaye’g-lalaki nga nalantawan nila sa unahan. “Tana uy, maghinay-hinay na ta’g lakaw sa atong giestaran nga lodging house,” matud ni Camel sa dayong tindog.

Nakatagpilaw ang nagbantay sa counter sa pagsulod nila. Wala kini makabantay sa ilang pagsulod. Hinay nila nga gibuksan ang kwarto ug gipasiga ang suga. Nanulod sila ug gi-lock ang kwarto. (Sumpayan)