Pareho'g middle name

Dear Tita Salie,

Have a good day. Just call me Angelie, 20 years of age. I have a boyfriend and I love him very much.

Taga Cebu lang ko ug kanunay gayod nga magbasahan og Banat News labina sa imong column ang pasabta. Tungod niini naaghat pud ko og padala sa akong dugay na nga problema. Hinaut unta imo kong katabangan.

Aduna koy hinigugma ug almost 2 years na kami sa among relasyon. Kining among problema amo kining gidaladala sugod pa gayod sa among pagkaila. Apan tungod kay duna mi gusto sa usa’g-usa wala lang namo panumbalinga. Pero karon nga nagplano na kami sa among kaminyoon, dili na gayod kami makalikay pa ug kanunay na namong hunahunaon

Nahasol kami kay ang akong love nga mao ang akong boyfriend pareho man og middle name sa akong papa. Wala gayod namo sultihi ang akong ginikanan kay nahadlok mi nga mosupak sila sa among gugma. Nahadlok mi nga buwagon ming duha, busa wala namo gisulti kanila ang kamatuoran.

Mosupak kaha ang among mga ginikanan sa among gugma, Tita? Dili ba mi puyde magminyo? Palihog pasabta ko. Daghang salamat and God bless. -- Angelie

* * *

Maayong adlaw kanimo, Angelie. Kun ang atong mga katigulangan ang atong pangutan-on kabahin sa imong pangutana, dili gayod sila mouyon nga kamong duha sa imong hinigugma magkadayon. Kay dili maayo paminawon nga ang imong papa ug ang imong hinigugma parehas og middle name. Pareho og apelyido ang ilang mga mama.

Apan kun kabag-ohan ang atong basehan ang imong suliran dili gayod lisod sulbaron ug kamong duha sa imong gugma magmalipayon. Wala’y problema kun pareho lang og middle name ang imong papa ug ang imong hinigugma as long nga dili sila managsoon. Seguro lang paryente sila o kaha manag-agaw lamang.

Kun atong sundon ang kabag-ohan sa balaod sa simbahan (Canon Law) hangtod lang second degree cousin ang dili puyde kaslon. Gilatid na sa Canon Law nga ang third degree mamahimo na nga minyoon.

Apan kun sa ato lamang panghunahuna mora og lainan gayod ta kay parehas man sila og middle name. Mura og duol-duol pa sa dugo silang duha. Inyo lamang pasabton ang inyong isigka pamilya, kabahin niining inyong problema aron kamo makaplano sa inyo unyang umaabot nga pamilya. -- Tita Salie