Sulagma nga Deyt

Gula 2

Nakasabot ra usab si Camela nganong gihimo ni Narding nga giangkon siya nga asawa dihang nagparehestro sila sa counter sa lodging house. Dili usab tuod siya gusto nga mauwawan nga mag-ipon sa usa ka kwarto nga walay relasyon.

Kwenta-kwenta ni Camela dako na usab ang P400 nga bayad sa kwarto kun maglain siya'g lawak. "Nganong nadugay ka man usab sa pag-adto sa pantalan Camel?" gipangutana ni Narding ang dalaga.

Mipahiyom si Camel. "Abi man gud nako og alas nuebe pa sa gabii ang biyahe sa barko kay ang 7 wala man mamaayo pagkasuwat sa nagsuwat sa tiket ug mora man og 9 basahon. Kay sayo pa man lagi sa akong pagtoo, nalingaw ko'g kanta-kanta sa akong gikan-an diha sa unahan."

Wala makapugong si Narding sa pagkatawa. "Kun mao pareho ta'g hubby, singing! Tana mamalik ta didto sa imong gikantahan kay wala pa usab ko makakaon Camel."

Dili kaayo layo sa lodging house ang giingon ni Camel nga didto siya magkanta mao nga nalangay. "Dimalas g'yud uy. Pagkasayud nako nga dili diay alas nuebe ang biyahe sa barko misakay pa ko'g taksi apan wala lang gihapon makaabot," ni Camela pa.

"Ayaw'g huna-hunaa nga wala ka makasakay kay pareho ta. Tingali gusto g'yud sa Ginoo nga magkatagbo ang atong dalan dinhi sa Davao kay wala man kita magkakita didto sa Lapulapu," matud ni Narding.

Wala na mukaon pa si Camel. Mi-order ra siya og usa ka botelya nga softdrink. Samtang nagkaon si Narding, nagsuginlanay sila sa ilang kaagi.

"Nganong kalayo ba nimo og gitrabahoan Camel? Wala ba'y trabaho nga kasudlan dinhi sa Davao?" gipangutana ni Narding ang dalaga. "Naa man. Gusto lang ko nga makalimot sa akong kaagi dinhi." Naglibog si Narding sa gisulti ni Camela. Sa tanto nga pagsukit-sukit ni Narding iyang nahibaw-an nga may anak diay si Camel nga iyang gibuhi ug ang amahan niini mibiya kaniya sa dihang gimabdos niya ang bata.

"Ikaw nganong mianhi ka man usab dinhi sa Davao?" bawos nga pagsukit-sukit ni Camela kang Narding.

"Gipatambong ko og conference sa among kompaniya. May branch man ang among kompaniya dinhi ug diri madistino ang akong maguwang kaniadto, apan ambot nganong nagpabalhin man sa Cebu. Ako'y iyang gipadala," matud ni Narding.

(Sumpayan)