Sulagma nga Deyt

Gula 1

Nagdali si Narding nga misulod sa pantalan kay hapit na molarga ang barko nga buot niya sakyan balik dinhi sa dakbayan sa Sugbo. Siya man gud ang gipadala sa ilang kompaniya nga motambong sa duha ka adlaw nga conference didto sa Davao.

Sipyat g’yud kay nauwahi si Narding og pila ra ka minutos kay naalsa na ang damyo sa barko dihang miabot siya sa ngilit sa pantalan.

“Wala g’yuy swerte parts kay misibog na ang barko gikan sa pantalan,” matud sa usa ka arrastre worker.

Nakapangagho si Narding kay nagkahulogan kini nga ugma na usab sa gabii siya nga makasakay gawas kun mag-eroplano siya. Kuwang usab ang kwarta nga gipadala niya sa kompaniya.

Huyhoy ang abaga ni Narding ug nakighigala ra siya sa gwardya nga nagbantay sa gate sa pantalan. Gitug-anan siya sa gwardya kun asa dapit ang barato nga lodging house.

Taud-taud, may taxi nga mihunong sa gate. “Wala na ma’am, nakabiya na ang barko paingon sa Cebu,” nadunggan ni Narding ang gwardya nga nakighinabi sa babaye.

Giduol ni Narding ang pasahero. “Sa Cebu ka usab diay unta paingon ma’am? Pareho ta nga wala makaabot,” ni Narding pa. Nanaug gikan sa taksi ang babaye ug gidiskarga ang iyang mga butang.

Nagkasultihanay sila si Narding ug ang babaye. Nailhan ni Narding nga Camela ang ngalan sa babaye ug nagtrabaho kini isip katabang sa balay diha sa Lapulapu City.

“Para makadaginot kita Camel, mas maayo nga mag-usa ra ta og kwarto nga kaestahan karong gabhiona kun dili nimo lainon og sabot para makadaginot ta sa gastohan. Unya, manuroy ta sa siyudad,” giingnan ni Narding si Camel.

Wala dayon motingog si Camel. Daw sa naghuna-huna kini unsay maayong itubag. “Nalipay ko nga may kauban Camel abi nako og ako na lang usa ang nabiyaan sa barko,” ni Narding.

Gitabangan ni Narding si Camel pagdala sa iyang mga dad-onon ug gilakaw ra nila ang giingon sa gwardya nga duol ug barato ra nga lodging house. Tuod, wala sila masayop kay P150 ra ang usa ka adlaw nga pag-estar sa kwarto.

“Nganong nagpaila ka man nga magtiayon ta?” nakapangutana si Camel kang Narding human nila mapahimutang ang ilang mga butang sulod sa kwarto.

“Para dili kita mauwawan Camel nga nag-usa ra sa kwarto tungod kay apiki ta sa kwarta,” hagawhaw ni Narding. Wala na lang usab motingog pa si Camel. (Sumpayan)