Gugma sa taga Isla

Gula 7

Sa tanto nga pagromansahay nila ni Ronald ug Jenny pareho sila nga gianod sa tagsa-tagsa nila ka mga pagbati. Nagkatinutokay sila’ng duha ug dayon mihimo na usab og laing hugna sa pagparayganay samtang sila nagtindog lang.

“Dali adto ta sa kwarto,” hinay ang tingog ni Jenny. “Apan basin masak-an kita sa inyong katabang Jenny,” may gamay’ng kabalaka si Ronald apan inanay kining nahanaw.

“Dili lagi. Mosaka ra kana dinhi si Manang Celing kun tawgon. Dili man siya basta-basta ra nga mosaka diri sa taas nga dili tawgon,” ni Jenny pa nga miabli sa pultahan sa kwarto.

Gipadayon nila ang pagparayganay nga wala na gayo’y pugong-pugong pa kay sigurado sila nga wala nay makakita kun unsay ilang pagabuhaton. Gipahigda ni Ronald si Jenny sa iyang hunol-hunol nga higdaanan.

Daw nalumsan na g’yud sila si Ronald ug Jenny sa grabeng kahinam nga ilang gibati hangtud nga nahitabo g’yud kanila ang dili unta angay’ng mahitabo. Pareho silang duha nga natagbaw sa ilang pagparayganay.

“Sori kaayo Jenny, nadala g’yud kita kainit sa atong mga pagbati. Apan walay problema Jen, ulitawo ko ug andam manubag sa tanan ko nga obligasyon kanimo,” ni Ronald pa ngadto sa dalaga.

Nag-ilis sila pagdali ug nanganaug, dayon nagdungan sa pagpangaon. Daw mga bag-ong magtiayon sila si Ronald ug Jenny kay sila rang duha sa balay, gawas sa katabang.

Human nila’g kaon, misaka sila pagbalik sa taas ug taud-taud, nanulod na usab sa kwarto sa dalaga. Gisubli na usab nila ang walay pugong-pugong nga pagparayganay sa usa’g-usa.

“Unsay imong gusto Jen, magminyo ta nga magtungha ka pa o humanon usa nimo ang imong pag-eskwela?” gisukna ni Ronald si Jenny. “Tinuod ka? Duna ka man kaha’y girlfriend sa siyudad?” matud ni Jenny.“Wala na kami maayong relasyon tungod sa bati niya nga batasan. Ikaw na karon ang akong ikaduhang bathala Jenny nga dad-on ko sa altar sa simbahan aron pakaslan,” ni Ronald pa.

Nag-ukobay na usab ang masi’g nila ka mga ngabil sa usa ka matam-isong pagparayganay. Pag-abot sa gabii, namalik sila sa basketball court diin didto gihapon ang mga higala ni Jenny nagpaabot.

Tungang gabii na nga miuli sila sa balay ug gisugat sila ni Manang Celing. “Adto na ko sa akong kwarto day, kamo na lay bahala diha,” sa katabang pa.

“Adto ko matulog sa imong kwarto karon Jen ha?” hagawhaw ni Ronald. “Saka lang unya kun mingaw na sa kwarto ni Nang Celing.” (Kataposan)