Man Hater

Gula 19

“Wa kay konsensiya, Roger!” padayon ni Salie. “Giguba mo ang kinabuhi ug kaugmaon sa akong igsuon! Magbayad ka sa imong gibuhat!”

Wala gihapon motingog si Roger. Wala na kaha makaagwanta ang lalaki sa mga gipamulong ni Salie, nabati na lang sa dalaga nga mi-klik ang telepono sa pikas linya.

Napusdak ni Salie ang awditibo nga iyang gigunitan. Nagpangurog siya sa kalagot.

Sukad nga nagkasulti silang Salie ug Roger sa telepono, ang dalaga kanunay mag-atang sa ulitawo sa gitunghaan niining University of Cebu. Matag hapon-inigpauli niya gikan sa publikasyon mohapit gayod siya sa nahisgotang tunghaan ug magpaatbang sa pultahan. Gusto siyang makakita sa personal kang Roger Justiniano.

Apan si Roger wala gayod ikabagat ni Salie. Wala gayod siya makaatol niini sa tunghaan. Maayo unta kadto kun nasayod pa siya sa schedule niini sa klase, segurado gayod nga iya kining masapnan.

Paglabay sa pipila ka adlaw, si Salie nakahukom nga mohunong una sa pag-atang sa ulitawo sa tunghaan niini. Mo-concentrate na lang siya sa iyang trabaho kay misantop sa iyang hunahuna nga moabot ang higayon nga mao nay maggahas og dalan aron magkatagbo sila si Roger.

Usa niana ka sayong gabii human si Salie makapanihapon ang dalaga nakahunahuna pagtan-aw og programa sa telebisyon. Maoy iyang gitan-aw ang Philippines Most Wanted ni Raffy Castro. Sa iyang pagbukas sa TV mao gayoy pagpadangat sa report bahin sa usa ka lalaki nga milayas gikan sa mental hospital. Gipaminaw niya’g maayo ang detalye sa balita ug gisud-ong pag-ayo ang hulagway sa tawo nga gipakita sa screen. Gitiman-an niya ang ngalan sa lalaki si Lito Galacia. Usa ka kriminal. -- Sumpayan pa