Gugma sa taga Isla

Gula 5

Wala na hisguti ni Ronald ngadto ni Jenny ang iyang pagbati samtang silang duha naglakaw nga nagginunitay sa kamot paingon sa basketball court sa Sitio Tunga nga nahimutang usab sa kinatung-ang bahin sa Isla sa Botigues.

Apan alang kang Ronald bisan og wala pa siya sugta ni Jenny, susama na sila og managhinigugmaay kay gani kun may makakita kanila, “loving” na man kaayo sila nga tan-awon ubos sa kahayag sa buwan.

Nagdanga-danga na sila sa basketball court. Gisugat sila sa mga higala ni Jenny nga mihangop dayon sa dalaga. “Mao na siya day?,” nadunggan g’yud ni Ronald ang usa ka amiga ni Jenny nga mihunghong. Igo lang mipahiyom si Jenny ug miingon “Wala pa day uy.” Gibati ni Ronald nga mora siya’g artista kay nakighimamat kaniya ang mga higala ni Jenny.

“Hala day naa ra ba si Carlo sa atbang, dili kaha na manghagis ron?” giingnan si Jenny sa usa niya ka higala. “Gipasidan-an na siya ni Papa nga dili hilabtan si Ronald,” pasabot ni Jenny ngadto sa higala. Sagad g’yud nga himoon sa mga batan-on kun hayag ang buwan, magduwa sila og “tubig-tubig” sa dakung hawan sa basketball court. Miapil sila si Jenny ug Ronald ug nag-uban sa usa ka grupo.

Diha’y higayon nga sa tanto nila nga paninguha nga dili madakpan sa kontra, napagakus si Jenny kang Ronald, ingon man si Ronald abtik usab nga nakagakus sa dalaga.

Nahimuot kaayo ang mga higala nilang Ronald ug Jenny nga nagtan-aw kanilang duha. Human sa ilang duwa, nagtupad si Ronald ug Jenny sa paglingkod. “Sori ganina ha, migakus ko nimo kay hapit ko matumba,” matud sa dalaga.

“No problem uy. Nalipay man gani ko nga imong gigakus bisan og wala pa nimo ko sugta,” maguwang sa hagawhaw ang tingog ni Ronald ngadto ni Jenny. Nakita ni Ronald nga mipahiyom si Jenny kaniya.

Hapit na tungang gabii nga mipauli sila sa balay. “Mag-midnight snack usa ta Ronald,” giingnan ni Jenny si Ronald. Siya mismo ang nag-andam sa ilang makaon. Taud-taud, migawas ang inahan ni Jenny gikan sa lawak.

“Jenny mobalik na kami si Papa nimo sa siyudad ugma sa buntag kay may problema sa atong tindahan didto. Pag-ayo-ayo kamo dinhi dong Ronald, aw dia man usab si Nang Celing nga atong katabang nga masangpit kun may kinahanglan,” matud sa inahan ni Jenny. – (Sumpayan)