Man Hater

Gula 15

Si Salie migawas dayon sa buhatan dala ang iyang mga gamit ug midali pagsakay sa iyang awto.

Paglabay sa pipila ka gutlo, diha na siya sa usa ka ATM booth. Nag-withdraw siya’g tulo ka libo ka pesos. Maoy iyang plano ang paghatag sa maong kantidad ngadto sa mga makililimos. Ingon siya niini kun motabang, dili magduhaduha basta maabot lang sa iyang bolsa. Karon nga wala na si Suzette nga iyang gigastohan sa pagtuon kaniadto mas maayo pa nga mapahimuslan ang iyang kuwarta sa labaw’ng nanginahanglan niini.

Apan nakugang siya sa iyang paghiabot sa dapit sa simbahan nga maoy gipundokan sa kabataan. Wala na didto ang mga makililimos nga buot niyang tabangan. Miduol siya sa usa ka tindera’g kandela ug nangutana. Iyang nasayran nga gipapahawa na ang mga makililimos sa maong dapit. Wala masayod ang tindera kun hain sila mamalhin.

Human makapasalamat sa hamtongong babaye, si Salie midali’g balik sa iyang kotse. Gipaandar niya ang makina ug gipadagan ang sakyanan. Dihay laing misantop sa iyang hunahuna.

Mipaingon siya sa University of Cebu, ang eskuylahan kanhi ni Suzette. Ang iyang tuyo mao ang pagpangita kang Roger, ang lalaki nga maoy hinungdan sa pagtubok sa iyang manghod. Iya nang sugdan pagtuman ang usa ka panganti nga naumol sa iyang alimpatakan. Manimalos siya! Iyang panimaslan ang lalaki nga maoy nakaingon sa kamatayon sa iyang igsoon.

Nabatyagan ni Salie nga ang pagdumot ngadto kang Roger nga iyang gihambin ug gitan-ogan daw daob sa kalayo nga nagpanglagiti ang mga aligato sulod sa iyang kahiladman. Daw dili magmalinawon ang iyang tanlag kun dili siya makapanimalos sa gibuhat ni Roger sa iyang manghod hamokon siya sa iyang kasilag. -- Sumpayan pa