Pusil ang giopera

Bang! ‘Huh! Nakugang si Lisa. Nihana og bangon sa iyang gihigdaan. Sipa kaayo ang buto sa pistola ning mamingaw nga kaadlawon. “Kasayo ba sab nilang magpasalba. Nga layo pa mang pasko,” tuaw niya sa hilom.

Nihikap siya’s tuong habig sa ilang katre. Wa diha ang iyang kapikas. Nitimbakuwas siya. Gipindot niya ang swits sa suga sa ilang lawak. Nidagan siya ngadto sa sala. Gipasiga niya ang usa sa sala. Maoy nisugat sa iyang panan-aw si Randy nga nagligdas sa karpet sa ilang sala. Nabulit sa dugo ang iyang agtang. Duol sa iyang tuong kamot sa sawog ang pistola nga nag-aso pa.

“Randy! Nganong gibuhat mo kini?,” singgit niya.

Gisapupo niya ang ulo ug abaga sa kapikas.

“Nang Lisa! Naunsa si Noy Randy?” sukot singgit ni Gemma nga naghangos sa kalisang. Nidagan siya’s sala gikan sa iyang lawak pagkabati niya’s singgit sa among babaye.

“Dali! Pagtawag og ambulansiya!” ni Lisa nga puwerteng luspara.

Nakamatikod siya nga wa na mahimutang si Randy sa niaging mga tulo ka buwan. Nagsugod ang iyang kausaban sa panglihuklihok pag-uli nila gikan sa klinika ni Dr. Ramon Escobido.

“Duna kay tumor sa imong utok dapit sa imong hubon. Ang imong bukol kaniadto, nilamay ug nahimong tumor. Imposible ning maoperahan,” sa doctor sa sulod sa iyang klinika. Daw nahugno ang kalibutan alang kang Randy. Nigakos si Lisa niya ug nanglugmaw ang mga luha.

“Nganong di man ni maoperahan doc?” ni Randy nga nagping-it.

“Talagsaon kaayo ni imong tumor. Kun tandogon, ni dilikado’g madali imong kamatayon,” pasabot sa doctor.

“Pila naman lang ka tuig akong tagal doc?’ ni Randy. “Unom na lang ka buwan,” sa doctor. Nidanguyngoy si Randy. Gigakos ug hugot ni Lisa.

“Unsa naman lay akong buhaton doc?” ni Randy.

“Labing maayo suwayan nimo’g adto paopera sa America. Kay daghan man didtong mga modernong kahimanan,” sugyot sa doctor.

Nagpanglingo-lingo si Randy. Maglisod man gani sila sa pag-abot sa presyo sa operasyon sa Pilipinas, sa America pa ba.

Sa mga sugilanon ni Randy, nasayran ni Lisa nga nagsugod lang ni iyang tumor sa bukol tungod sa iyang hubon. Hayskul pa siya niadto. Nakigdula siya’g bala-bala sa iyang mga kababata sa ilang baryo. Didto sila’s daruhan. Pagbala niya sa iyang kaparis nga si Boy, nikumedya’g tuwad si Boy. Nahulog si Randy ug nabugsok iyang ulo sa yuta. Niuli siya adtong higayona nga may bukol sa iyang hubon. Karon lang kabaghoan nga nisakit ang bukol. Sa dihang wa na siya kaagwanta nagpatan-aw si Randy sa doctor. Nisamot alang ni Lisa ang problema, kay nagsabak na siya sa ilang unang liwat. Wa pa ni ikabutyag niya sa iyang kapikas.

Bag-o lang nakapasar si Randy sa board exam sa pagka CPA. Nangita na siya’g opisina nga kaabangan. Si Lisa nagtrabaho sa Centenial Bank isip usa ka teller. Kaklase ni sila sa kolehiyo. Nagkakauban lang sila sa usa ka research group. Sukad niadto, wa na sila magbuwag.

Wa pa sila’y tuig nga minyo. Wa gyud unta sila’y problema. Tubigtubigan ilang mga ginikanan. Ang regalo sa ginikanan ni Lisa, yuta sa Spring Hill Subdivision. Ang balay nga gitukod diha, regalo sa mga ginikanan ni Randy. Ang masigkaginikanan nila nipasalig nga maoy mogasto sa operasyon ngadto sa America. Apan nibalibad si Randy. Wa na konoy panahon.

Sa hospital, gidala si Randy sa ICU. Giatiman dayon siya ni Dr. Escobido. Nagsige og dangoyngoy si Lisa. Gigunitan siyang Gemma aron sa pag-am-am. Dakong kahingangha sa doctor kay nawala na ang tumor sa ulo sa pasyente. Ang bala sa pistola niagi sa ibabaw sa agtang niya ug nilapos sa bagulbagul. Gikahig niini ang mga dautang unod sa bukol ug tumor. Nagarasan la’g gamay ang iyang utok. “Usa ka dakong milagro!” tuaw sa doctor.

Paglabay sa usa ka semana human natambalan si Randy, nikipatkipat ang iyang mga mata. “Ayaw ko ninyo’g paantosa. Gusto na kong mamatay,” bakho niya.

Nitindog si Lisa gikan sa iyang gilingkoran.

“Salamat sa Diyos nga nagmata ka na. Maayo ka na, Randy. Wa ka nay tumor. Angay tang magpasalamat sa Diyos sa iyang milagro. Di pa gyud ka patyonon. Naoperahan sa pusil ang imong tumor,” ni Lisa nga mapahiyomon. Ninganga si Randy sa iyang nadungog. Daw di siya katoo sa nahitabo. “Moanhi ro’s Dr. Escobido ug pasabton ka,” ni Lisa.

Inig human ni Dr. Escobido og pasabut ni Randy, si Lisa na sab ang may ibalita niya. (kataposan)