Ungo nga nadung-gaban nagluya

May gikahibudngan si Marko sa linihokan sa iyang karibal nga si Diomedes kay sa matag higayon nga mamisita siya kang Divina ug inig pananghid niya nga mopauli na siya, dili pud madugay motunga si Diomedes.

Sa iyang tan-aw ning tawhana mora’g sobra ra ka misteryoso. Matud pang Divina iya kunong nakita si Diomedes nga nagpangitngit panahon sa kagabhion kay mogawas man dayon kini sa higayon nga manambo siya sa bentana. Ug matud pang Divina puwa kaayo’g mga mata kini si Diomedes sa higayon nga mamisita kini kaniya.

“Hala, uy, mahadlok man ko anang Diomedes, uy, Marko,” ni Divina pa usa kadto ka gabii sa pagpamisita ni Marko sa dalaga.

“Nganong mahadlok ka man, kay ngano man diay?” nagpakisayod ang ulitawo.

“Lain kaayo siya’g tinan-awan nako. Ug naa pay mga mata nga hilabihan ka puwa,” sa dalaga pa. “Dili kaha na siya ungo, Mark?”

“Ungo gud tawon. Wa na roy ungo, uy.”

“Basta kay lain kaayo siya’g linihokan, uy, Mark.”

“Taga diin gani na si Diomedes, Div?” nangutana si Marko.

“Taga sityo Manukon.”

“Ha! taga sityo Manukon kana si Diomedes?” mora’g nanagko ang mga mata ni Marko. “Sus, daghan ra ba kaayong ungo dihang dapita...”

Gibati og kakuyaw si Divina sa gisulti ni Marko. Kay alang niya mahadlok gyud siya og mga ungo. Kaniadto sa gamay pa siya kun makabati siya’g mga istorya bahin sa mga ungo mokurog dayon siya sa kahadlok ug dili na siya pabiya sa iyang mama Tasing.

Ug karon nga dunay nangulitawo kaniya nga kadudahan ang mga lihok, gibati na gyud siya’g kahadlok. Apan kanilang duha ni Marko ug Diomedes, si Marko ang iyang gisugot kay nahigugma man siya niini. Tungod niini naglagot si Diomedes ug usa ka gabii niana sa iyang pagpamisita, iyang gipakita kang Divina ang tinuod niyang pagkatawo.

“Tutoki ko, Divina, tan-awa pag-ayo ang akong hitsura,” ni Diomedes pa nga nausab ang panagway.

Eeeeeee!! Ungooooo!!!” misinggit si Divina ug maoy pag-abot ni Marko ug nakita gyud ni Marko ang bayhon ni Diomedes nga dili na mao kini.

Giibot ni Marko ang iyang punyal ug gidunggab si Diomedes. Naigo apan mora lang og way nahitabo kay milakaw lang kini’g hinay ug may gibilin pang mga pulong.

“Wa pa ta mahuman,” Bay, balikon tika ugma ug dayon niining suot sa kagabhion sa gawas.

Unya, milabay ang duha ka semana wala na magpatim-aw si Diomedes ug matud pa sa nakaagi sa balay ni Diomedes nga si Pikta nga tindera’g isda, nagluya kuno si Diomedes ug naghigda na lang sa iyang kuwarto. Gihilantan kuno.

“Baraw nga boronse ang akong gidunggab kang Diomedes, Div,” nagkanayon si Marko.

“Ungo diay gyud kana sila si Diomedes kay may nagsulti nako, nga ang mga ginikanan ni Diomedes kanunay lang makita nga magtuwad sa agianan paingon sa sityo.”

Pagka-sunod gabii, mibisita si Diomedes kang Divina ug daot na kaayo kini ug luspad na kaayo. Mora’g himatyon na. Unya, miabot si Marko nga nagdala’g bulak sa kapayas nga laki, ug pagkakita ni Diomedes sa bulak sa kapayas, kalit lang kining milayat sa bentana ug sukad niadto wala na gyud pakita si Diomedes. (Kataposan)