Ang white lady sa Raintree Mall

Tinuod ba nang giingon nilang White Lady, Gal?” Nangutana ang usa ka higala ni Gally. “Tinuod man gani ta, sila pa kaha?” tubag sa magsusulat.

“Nganong nakaingon ka man niana?”

“Sanglit kana silang tanan mga espiritu ug dili kana sila makita gawas na lang kun gusto silang magpakita. Ug nganong tinuod sila, sanglit wala pa buhata sa Ginoo ang kalibutan, una silang gibuhat apan didto sila sa langit.”

“Unya, unsa may nahitabo, nganong nia man sila sa kalibutan?”

“Unang gibuhat sa Ginoo ang ilang lider nga si Lucifer nga kun tawagon si Kabugason ang Anak sa Kabuntagon. Gibuhat siya sa Ginoo nga wala’y ikasaway gikan sa lapalapa sa iyang mga tiil hangtud sa alimpulo sa iyang ulo. Sa laktud, usa siya ka perpekto nga linalang ug siya ang labing ambongan sa tanang binuhat sa Diyos. Gihatag kaniya sa Diyos ang gahum nga tupong sa Diyos nga Magbubuhat nga ang kalainan na lang nila, nga ang Diyos ang nagbuhat ug siya binuhat.

“Tungod niining tanan nga iyang naangkon, nagmapahitas-on siya ug gusto pa niyang labwan ang Diyos nga nagbuhat kaniya. Busa iyang gidani ang iyang mga sakop nga mga anghel aron makiggubat sila sa Diyos. Gilabay sila sa Diyos dinhi sa kalibutan nga ang uban didto napunta sa kadagatan, sa kalasangan ug kabukiran, sa mga pangpang ug niining bag-ong panahon, nia sila mismo sa mga siyudad, labi na sa mga dagkong edipisyo o bilding.”

“Wa pa gyud ko kakita nianang White Lady, Gal.”

“Kun gusto ka, karong gabii adto ta sa Raintree Mall kay may amigo kong sekyu sa gabii ug kanunay magpakita ang White Lady.”

Giadto dayon ni Gally ang amigo niyang sekyu sa Raintree Mall. “Bay, naay akong higala nga gusto makita ang White Lady sa Raintree Mall, pwede ba?”

“Alas diyes paman sa gabii ang akong duty hangtud sa buntag, busa adtoa na lang ko ninyo sa alas onse kay mag-atang na lang ko ninyo.”

Nianang gabhiona, mingaw na kaayo ang Raintree Mall sa among pag-abot. Didto ang amigo kong sekyo naghulat namo.

“Anhi lang ta manlingkod, Gal, kay karong mga alas dose mogawas ang White Lady. Duha na sila, ang usa gikan diha sa may dakong acacia ug ang usa, gikan diri sa mga kuwarto.”

Tuod man, nianang mga alas dose, migawas ang usa gikan sa may acacia ug nianang pagkataudtaod, migawas sab ang usa. Diha mismo moagi sa among atubangan.

Human niadto, “Unya Bay, nakakita kana gyud og White Lady,” matud ni Gally.

“Wa man lang ta panumbalinga, igo man lang miagi sa atong atubangan.”

“Ingon sila niana, Bay, dili na sila manumbaling nato, sige mamauli na ta.” (Katapusan)