Man Hater

Gula 12

 “Daan na kining imong sugilanon,” pintok nga pamulong sa editor. “Nakabasa na ako niana sa ubang mantalaan. Naa sab kana sa radyo ug telebisyon. Dili kana ang matang sa estorya nga makadapit sa pagtagad sa mga magbabasa.”

“Apan, Sir,” ni Salie pa nga nangatarongan, “managlahi og estorya ang matag tawo.”

“Bitaw, Sir,” dason ni Allan nga mipakita’g pagdapig sa dalaga.

“Apan usa lang ang punto sa imong sinulat,” miingon ang editor nga didto motan-aw ni Salie. “Ang kakabos. Ug bisan asa mo iliwag ang imong mga mata mao kana ang imong makita. Duna pa bay bag-o mahitungod niana? Common na kaayo ang imong estorya, Miss Valle.”

Wala makatingog si Salie. Ingon sa nahugno siya nga naghunahuna nga nahulog sa wala’y kapuslanan ang iyang gipulawan kay gi-reject man sa edior ang iyang sinulat. Nakapangagho siya. Nahisagmuyo siya.

“Maoy angay mong sulaton ang mga panghitabo nga makapahinuktok sa usa ka magbabasa,” padayon sa editor. “Pananglit, kanang bahin sa dili kasarangang mga panghitabo.”

Nagpabilin nga nagpakahilom si Salie. Si Allan nagtutok kaniya nga ingon sa naluoy.

“Maora ka na man hinuon og dili journalist nianang imong kalaki, Miss Valle,” matud na usab ni Editor Suarez. “Maora’g karon ka pa niining matanga sa buluhaton.”

Wala gihapon motingog si Salie. Apan misanting ang iyang mga dalunggan sa iyang nadungog gikan kang Editor Suarez. Naitlib niya ang iyang wait.

Midagkot og sigarilyo si Editor Suarez. Ug tapos makapabulhot og mabagang aso, mibalik kini pag-atubang kang Salie Valle. -- Sumpayan pa