Man Hater

Gula 11

Mitungab na usab siya sa alak. Hataas nang panahon nga wala siya mahigugma og babaye, sukad niadtong pagkapakyas sa una niyang gugma. Karon lang mipitik pag-usab ang iyang kasingkasing sa maong talagsaong pagbati nga nakita niya si Salie.

Gitak-op niya ang pultahan ug mibalik siya sa iyang kuwarto. Milingkod sa ngilit sa kama nga nagunit gihapon sa botelya sa bino. Naglibog siya kun unsay maayong approach aron dili masuko si Salie kaniya sa higayon nga iya kining tug-anan sa iyang gibati. Estrikta ra ba ang babaye nga man hater.

Miabot na lang ang tungang gabii apan si Allan wala gayod makahunahuna sa maayo niyang buhaton. Nakatulog na lang siya nga nalabian sa pag-inom sa alak.

Nianang pagkaugma, human sa pamahaw, miadto gilayon si Salie sa buhatan sa Sunlight Publishing Inc. Sayo pa kaayo sa iyang paghiabot. Pipila pa lang ka empleyado ang diha na sa opisina. Midiretso siya sa lawak sa ilang editor aron pag-submiter sa iyang manuskrito. Diha na diay si Allan ug nagkuyog na lang sila ngadto sa buhatan ni Editor Suarez.

Paghisulod niya dihadiha nangatahoran siya sa ilang labaw sa publikasyon. Nangatahoran usab si Allan. Mitando nga mapahiyomon ang gulangong lalaki ug mitanyag kanila’g lingkoranan.

Milingkod si Salie sa usa ka silya nga atbang sa gilingkoran ni Editor Suarez nga giulang lang sa malinis nga talad nga gipatungan sa telepono ug daghang mga papel. Si Allan didto mopahimutang sa lingkoranan sa iyang tuong kilid. Gitunol dayon sa dalaga ngadto sa editor ang iyang manuskrito nga gisulod sa tabunon nga envelope.

Gihulbot dayon ni Mr. Suarez ang upat-ka-pahina nga sinulat ni Salie ug kini iyang gitamdan. Apan wala na kini tiwasa pagbasa sa editor. Iya kining gilamba sa ibabaw sa lamesa. Unya maoy gisunod niini’g suhid ang mga hulagway nga diha sa envelope. Ingon sa wala kini mainteres kay igo man lang niining gipalabyan sa panan-aw ang mga retrato. Ug mikulismaot ang nawong sa editor. -- Sumpayan pa