Man Hater

Gula 10

Dili ako mahisama nila ni Mama ug Suzette. Malig-on ako. Dili ako magpadaog sa problema. Mosukol ako. Ug dili ako magpakamatay tungod lang sa lalaki. Dili ug dili gayod! Didto molugan-ob kining mga pulonga sa kahiladman ni Salie.

Wala dayon makatulog si Allan nianang gabhiona. Nagbuy-od siya nga naghayang didto sa iyang kama. Nagsul-ob siya og padyamang kolor asul. Ang iyang tuong bukton gibad-ay didto sa iyang agtang samtang nagpitawpitaw ang mga mata nga nagtutok sa kisame.

Maoy nanumbalay sa iyang hunahuna si Salie. Daw sa gihamok siya sa katahom sa dalaga. Belib siya sa kaanyag nga nahuptan niini. Biyuting Pinay gayod. Milutaw ang natural nga katahom niini bisan og wala kini mamutang og mga patahom.

Nabihag siya sa katahom sa dalaga. Sa una pa lang niyang pagkakita niini sa ilang panaghimamat didto sa buhatan ni Editor Suarez ingon sa dihay talagsaong pagbati nga mitigib dayon ug inanay’ng mihakgom ug miulipon sa iyang galamhan. Apan malisod ang pagpadayag niini ngadto sa babaye. Nahimo niyang suliran ang batasan niini. Maglisod siya pag-approach aron i-esplikar sa dalaga ang iyang gibati.

Mibangon siya ug migawas sa iyang kuwarto. Mipadulong sa kusina. Tapos kaablihi ang refrigerator, gikawhat niya ang usa ka botelyang bino. Gidala niya kini ngadto sa sala. Mitungab og usa ka lad-ok sa bino nga tanlas ang kalami.

Giablihan niya ang bentana ug milantaw sa gawas. Buot niyang lingawon ang iyang kaugalingon ngadto sa laing mga butang kay ang sulod sa iyang hunahuna niadtong higayona mao ra gayod si Salie. Apan wala siya’y nakita didto sa gawas nga nakakawhat sa iyang pagtagad. -- Sumpayan pa