Man Hater

Gula 5

“Nga man hater ka?”

May talinggab ang tinan-awan ni Salie nga gipasupot ngadto sa ulitawo. Kalit niyang gilubag ang manibela pawala. Gipadagan niya ang sakyanan. Napakong ang ulo ni Allan sa kilid sa awto.

“Hinayhinay lang,” mireklamo si Allan. “Tingalig madisgrasya kita nianang kalaki mo.”

“Ang imong trabaho mao ang pagpanguha’g retrato,” miingon si Salie nga nagpaminti sa kalagot,” dili ang pagpanghilabot sa kinabuhi ko! Wa kay labot sa pagka-man hater ko!”

“Sorry,” ni Allan sa kamapainubsanon. “Dili na kadto mausab.”

“Angay lang,” ni Salie, “aron magkasinabot ta.”

Wala motingog si Allan. Gitutokan niya si Salie ug dayon naglingolingo siya. Estrikta ug malditang babayhana, nakaingon siya sa hilom.

“Asa man kita paingon karon?” sa ulitawo pagkataudtaod.

“Maglibutlibot kita sa siyudad,” ni Salie. “Gusto kong mosuwat og estorya bahin sa mga tawong nagbagdoy sa kadalanan.”

Nahilom si Allan. Silang duha nangahilom. Ang pagtagad sa dalaga didto lamang sa iyang pagmaneho. Usahay motan-aw si Allan kaniya apan molingiw lamang usab dayon kini kun iyang lingion, mopasangil pagtan-aw sa karsada.

Nakalabay sila’g mga tawong bulingit, mga makililimos ug mga batang naglatagaw sa kadalanan sama sa irong wala’y tag-iya. Gihunongan kini ni Salie ug gipakuhaa’g hulagway kang Allan. Ang ulitawo mituman sa mando nga wala’y kusmod. Si Salie mihimo og taped interview sa mga tawong gikuhaan og hulagway ni Allan. -- Sumpayan pa