Ang pinaskohang kwentas

Tuig 2011. Pipila nalang ka hinagtos sa orasan, pasko na gyud. “Mama, kinsa ning christmas gift nga wa may ngalan,” matud pang Junjun nga linga kaayong nanghinan-aw sa mga pinutos nga gipahimutang ibabaw sa lamisa.

“Bitaw no? Pero pasagdi lang una na diha, Jun,” mitubag ang inahan, “lakaw na sa silong kay gihulat kana sa imong mga ig-agaw.”

“Nindota unta Ma no, kun duna pa koy pinaskohan ni papa Fredmon,” sa bata pa nga nasubo.

“Sagdi lang Dong, aylag kaguol, total duna ka man sab nga pinaskohan ni mama Riza mo.”

“Tinuod ka ma?” Mikidlap ang mga mata ni Junjun sa kalipay.

Og unya, wa tuyoa, nanumalik sa panumdoman ni Riza kadtong mapait nga nangagi. Gabii kadto, “Tabang! Fredmon! Ang bata nahulog! Misinggit si Riza, dihang mitakilid ang barko nga ilang gisakyan.

Miambak dayon si Fredmon aron agpason ang bata nga nahulog sa dagat. Dugay nga mitidlom si Fredmon, hangtud nga nakasakay nalang sa lifeboat si Riza.

Unya kalit lang,”dali dawata ang bata Riza kay gibikogan ko, dayong unlod ni Fredmon human madawat si Junjun. Sa dihang hingpit nang nalunod ang barko, naluwas sila si Riza ug Junjun apan wala na igkita si Fredmon.

“Riza,” nahaigking siya sa sangpit sa iyang ugangan, “adtoa na si Junjun, pasak-a na sila.”

Wa magdugay, nagkiat lang nga nanaka sila si Junjun ug mga ig-agaw niini ug pipila ka mga silingan.

“Oops! Ayaw sa na ninyo hilabti ang mga gifts,” ni Riza pa, “kay mangaon una ta.”

Samtang nangaon ang mga bata, gipahimutang ni Riza ang mga pinutos. May nahibudngan siyang usa ka pinutos nga way ngalan. Gisuwatan nalang niya’g numero 13. “Kang kinsa kaha ni?” Tuaw ni Riza.

Human sa pangaon, tagsa-tagsa na nga gipangita sa mga bata ang ilang pinutos sibo sa ilang gikuptang numero. Pagkahuman may nahibiling usa ka pinutos ug gihatag nalang kini ni Riza kang Junjun.

“Mama, ha, ha, ha! Imo diay nakit-an kadtong kwentas nga hinatag ni papa nako nga nawala? Ni Junjun dihang na-ablihan na niya ang pinutos nga ika 13.

Nakurat ang inahan sa nabati sa anak. Nasayod siyang ang maong kwentas didto kang Fredmon sa dihang nahitabo ang trahedya. Inanay si Riza nalup-og, kay bisan patay na sa dugay panahon, padayon diay gihapon kining nagbantay kanila. (Kataposan)