Pulos kaduha

Dear Tita Salie,

Hello, ug maayong adlaw. Tawga lang ko sa name nga Ms. R.B., 18 years old palang ako apan duna nako’y anak ug nagbulag mi sa akong bana.

Nia ko karon sa Sugbo aron manarbaho ug ako lang gibilin ang akong anak didto sa amoa.

May hitsura man pud ko, Tita ug dili pa mailhan nga may anak na. Samtang nanarbaho ko dinhi sa Sugbo nakauyab ko. Buotan baya unta siya apan sad kaayo kay nagkabulag man mi kay kuno nasuko ang iyang mommy. Ug matud niya nga palargahon siya sa Korea. Unya iya kong giingnan nga minyo kuno siya apan ang tinuod dili diay. Duna ra bay nahitabo kanamo kaduha gayod.

Karon duna na sad koy laing uyab guwapo kaayo siya apan mao lang gihapon minyo ang maong lalaki. Duna na say nahitabo kanamo kaduha. Ug matud niya nagbuwag sila sa iyang asawa ug mas gihigugma daw ko niya. Matud usab niya nga dili sila kasal ug dili na kuno siya makigbalik pa sa iyang asawa.

Unsa may akong buhaton, Tita? Ako kahang ipadayon ang among relasyon kay dili man sila kasal. Naglibog gayod ko sa akong sitwasyon. Palihog pasabta ko, Tita. Daghang salamat sa imong pagtagad. God bless! -- Miss R.B.

* * *

Maayong adlaw kanimo, Miss R.B.

Mas maayo gayod nga maningkamot ka ug mag-antos usab gamay sa pagpangita og trabaho kay aduna ka na may anak. Ug bata ka pa usab pangita og kasudlan isip working student sa mga eskuylahan. Puyde ka usab magtrabaho sa adlaw ug moeskuyla sa gabii. Hinayhinay lang apan anaa ang tinguha nga makalampos gayod ka. Lisod kaayo ang kinabuhi karon kun wala tay maayong panginabuhian. Suwayan usab nimo ang pagpangaplay sa mga call center kay mao man ang daghan og opportunity karon.

Kabahin sa imong suliran, ayaw kaayo patuyang sa imong gibati. Sutaa una ang lalaki kun unsa siya ka matinud-anon kanimo aron dili na mausab ang imong gidangatan. Ayaw dayon pagtuo sa ilang mga pasalig ug mga binutbot nga makabuhi og patay. Dapat iyang mapamatud-an ang iyang mga pulong nga ikaw ang iyang gihigugma, pinaagi sa mga buhat. You have to challenge him nga iyang buhaton ug dili lamang litukon aron dili na masubli ang imong gidangatan. -- Tita Salie