Man Hater

Gula 1

Miatubang si Miss Salie Valle kang Mr. Pocholo Suarez ning buntaga. Mao pay iyang pagbalik og report sa trabaho karong adlawa. Mipalta siya’g kapin sa duha ka semana tungod sa kamatayon ni Suzette, iyang igsoon. Gigamhan siya’g maayo sa kaguol sa nahitabo.

Si Salie usa ka staffer sa Moon-Star Daily, ang nag-unang inadlaw nga mantalaan sa dakbayan sa Sugbo nga gipatik sa Sunlight Publishing, Inc. Aduna siya’y kolum nga mogawas matag adlaw sa maong mantalaan. Apan tungod sa nahitabo sa iyang manghod, naabandona niya’g pila ka adlaw ang iyang obligasyon sa publikasyon.

Masakit alang kang Salie ang kamatayon sa iyang igsoon. Naghikog si Suzette tungod sa kaulaw sa iyang gidangatan. Nagsabak kini ug wala pakasli sa iyang hinigugma nga maoy nakasala sa iyang kahimtang.

Apan ang pagtaliwan ni Suzette nagbilin og basuni nga malisod lugiton sa balatian ni Salie. Pinangga niya ang iyang manghod. Kini maoy natingban sa iyang pagmahal human sa pagtaliwan sa ilang mahal nga inahan sa pagbiya sa ilang amahan kanila nga nakigpuyo sa laing babaye.

“Kumosta ka, Miss Valle?” Timbaya ni Mr. Suarez, ang editor-in-chief sa Moon-Star Daily. Nag-irag ang gulangong lalaki sa swivel chair niini ug nagkalingaw’g yupyop sa sigarilyo. Giduot sa editor ang upos sa sigarilyo sa taltaganan sa agiw ug miatubang kaniya. “Nanawag ko sa inyo kagahapon apan wala’y mitubag?”

Wala motingog si Salie. Igo lang miduko. Nasabtan niya nga buot magsusi ang ilang editor sa iyang kahimtang human sa nahitabo sa iyang igsoon. -- Sumpayan pa