Video Karaoke

Gula 2

Dali ra kaayong nagkasuod sila si Terio ug ang babaye nga maayong mokanta sa iyang mga paborito nga awit nila ni Olivia Newton John ug Mary McGregor.

Si Terio ang mibangka og bayad sa tanang bayranan nila. Miorder si Terio og beer, samtang bottled juice ang giorder niya sa duha ka babaye nga sila si Pinky ug Glenna.

Si Pinky maoy nindot kaayo nga mokanta sa mga paborito ni Terio. Wala kini mobalibad nga mag-duet sila sa Endless Love ni Lionel Ritchie ug Dianna Ross.

Nahimo sila nga target sa mga mata sa ubang customers tungod sa nindot kaayo nila nga mga awit. Human nila’g kanta sa Endless Love, gitunol ni Terio ang iyang cellphone kang Pinky.

“Palihug ko sa imong contact numbers bi,” matud ni Terio. Gi-encode dayon ni Pinky ang iyang numero ngadto sa cellphone ni Terio, dayon iyang gikontak sa iyang numero.

“Ako usab ni nga i-save ang imong contact numbers,” ni Pinky pa. Gusto pa unta ni Terio nga makig-uban sa mga bag-o niyang higala apan mi-ring ang iyang cellphone.

Si Wencelen diay ang nanawag kaniya kay hapon na ug wala pa siya makapadala sa iyang obligasyon sa gitrabahoan niya nga mantalaan.

Usa ka magsusulat si Terio sa mga short story. “Moadto usa ko sa opisina kadiyot Pinky ha? Sori g’yud kaayo kay duna pa diay ko’y obligasyon nga wala nako matrabaho,” giingnan ni Terio si Pinky. Igo lang miyango si Glenna.

Maayo gani kay ang videokehan nga gikantahan nila ni Terio ug sa duha ka babaye duol ra sa gitrabahoang planta sa mantalaan.

Nahukman ni Terio nga ang bag-o niya nga kaagi maoy himoan niya’g sugilanon. May kabalaka si Terio kay wala pa siya masayod sa storyline niini ug kun unsay mahimong kataposan sa sugilanon nga iyang suwaton.

Dali ra kaayo niya nga nahimoan og unang yugto ang iyang sugilanon sa panagkaila niya ug ni Pinky. Human ikasumiter ni Terio sa editor ang iyang sinuwat nga mogawas dayon pagka-ugma, nagdali siya nga nanaug ug mibalik sa videokehan.

Apan wala na didto sila si Pinky ug Glenna. “Mipauli na mi Ter uy, gabii na,” matud ni Pinky dihang giteksan niya ang cellphone sa dalaga. “Ok see you next time na lang,” reply ni Terio.

“Asa diay ang inyo Pinky?” gisukna ni Terio ang dalaga. Taud-taud, nakadawat si Terio og reply. “Dia ra diri sa T. Padilla.” (Sumpayan)