Mata sa Kasingkasing

Gula 4

Dili makasugakod ang iyang mga ginikanan sa mga galastohan sa usa ka estudyante nga motungha sa kolehiyo. Nanginabuhi lang sila pinaagi sa pagpanguma.

Usa ka tuig. Duha ka tuig. Sulod sa maong gidugayon na-istambay si Angeline. Wala gyud siya makapadayon sa pag-eskuyla. Gusto unta siya nga mangaplay og trabaho sa dakbayan sa Tagbilaran. Apan dili mosugot ang iyang mga ginikanan kay way makaatiman sa iyang mga manghod. Busy man gud ang iyang tatay ug nanay sa pag-atiman sa ilang umahan.

Usa ka adlaw niana, may Amerikanong misyonaryo nga nahitungha sa ilang dapit. Sakop ang maong misyonaryo sa Menonite Church. Kuyog sa misyonaryo ang iyang asawa ug duha ka anak. Ania sila sa Pilipinas aron pagsangyaw sa mga maayong balita sa kaluwasan. Nagbase sila sa Carmen, Bohol.”

Gikahimamat ni Angeline ang misyonaryo nga si Walter Toews. Nakighigala kini niya ingon man ang asawa niini nga si Verna. Daghan kini’g gipakisayran gikan kaniya, lakip na ang estado sa iyang kinabuhi. Wala’y lipodlipod nga mitug-an si Angeline mahitungod sa iyang kahimtang. Lakip na ang ilang kakabos. -- Sumpayan pa