Pagbag-o sa kinabuhi

Gikan sa patag, nanuhotsuhot sa pandungog ni Greg ang paskohanong awit nga gibulhot sa usa ka sound system. Pagkatahom paminawon sa kantang “Give Love On Christmas Day” nga nanganaykanay sa lawom na nga kagabhion.

Hinay nga mitimbakuwas pagbangon si Greg. Gipasarap ang iyang panan-aw sa tanan niyang kaubanan sa walhong pagpakigbisog nga naghagok na sa pagkatulog taliwala ning lasang sa bukirang dapit sa Sugbo.

“Nahikatulog na si Kumander! Nahikatulog na ang tanan kong kaubanan. Pasko na! Bug-os na ang akong hukom nga hangpon ang diwa sa Pasko, diha sa pagbalik ko sa sabakan sa atong balaod! Usa ka hangop sa Pasko alang sa pagbag-o sa akong kinabuhi...!” nagkibutkibot ang baba ni Greg.

Milanat na og duha ka tuig si Greg sa iyang pagpasakop sa rebeldeng kalihukan. Hingpit niyang gibiyaan ang patag aron motipon sa New People’s Army nga sa iyang pagtuo maoy matuod nga grupo nga nagtukaw alang sa kabulahanan sa mga kabos nga linupigan ug aron makab-ot ang hustisya sa krimen nga nahimo sa mga adunahan nga dili madutlan sa ngipon sa balaod tungod kay tapin-an lang sa binandol nga salapi ang matag salaod nga ilang nabuhat.

Gipatay ang amahan ni Greg kay maoy nangulo sa pag-aklas sa mga trabahador sa asyenda og tubo nga nangayo og minimum nga sweldong suholan. Way hustisya nga nakab-ot ang kamatayon sa iyang amahan nga maoy hinungdan usab sa sayong pagtaliwan sa iyang inahan nga giatake sa sakit sa kasingkasing. Mihunong si Greg sa iyang pag-eskuyla sa kolehiyo sa siyudad, diin usa na lang unta ka semester ang iyang kulang aron mogradwar sa pagka-maestro. Hilom siyang mitipon sa mga rebelde sa bukid. Natuman ang iyang panimalos. Apan inanay siya nga nakaamgo sa kamatuoran.

“Lisod kontrahon ang atong kagamhanan, Greg. Pait ang kinabuhing magtagotago sa bukid. Balik sa sabakan sa balaod ug dawata ang gitanyag nga amnestiya sa atong gobyerno. Padayon og eskuyla sa kolehiyo tungod ug alang sa atong gugma...!” nagpakiluoy kang Greg si Salome, ang iyang hinigugma nga usa na ka eligible nga maestra nga nagmaestra sa ilang baryo dihang hilom kini niyang gipakigkitaan.

“Ayaw kabalaka, Sal! Sa di pa ang kasaulogan sa Pasko tumanon ko ang gisugyot mo kanako. Mobalik ko’s sabakan sa balaod ug hangpon ko ang pasko alang sa hingpit kong pagbag-o sa kinabuhi...!”

Nagkinto ang mga lakang ni Greg nga paspas nang milugsong paingon sa ubos. Hingpit na niyang biyaan ang iyang kaubanan didto sa bukid ning gabhiona. Daw nahipaglantawan niya ang malipayong panagway ni Salome nga mosugat kaniya sa patag aron salohan nila paghangop ang Pasko, alang sa pagbag-o na niya sa kinabuhi. (Kataposan)