Silent admirer

Gula 7

“Nakaadto ka na anang bukid nga makita nato sa atbang?” gisukna ni Karlyn si Bert samtang gitudlo niya ang daw naparot nga bukid nga nahimutang unahan sa GMA-7.

“Wala pa, nganong gusto ka moanha ta diha?” dali nga tubag ni Bert. Gipasabot si Bert ni Karlyn nga ang maong bukid bantang kaayo nga makita gikan sa balay sa iyang tiyo sa Banilad ug dugay na siya nga nangandoy nga maanha.

Gipasirit dayon ni Bert ang motor. Nakatultol siya sa agianan paingon sa dapit nga gitudlo ni Karlyn. Anha kini agion sa GMA Road atubangan sa Busay Barangay Hall.

Lugsongon ang gamay’ng agianan kilid sa GMA7 mao nga sa kakuyaw, migakus si Karlyn kang Bert. “Tan-awa Bert, mas nindot kaayo dinhing dapita, mingaw,” ni Karlyn pa.

Milakaw sila sa punoan sa kahoy’ng Kalatsotsi nga anaa g’yud nagbarug sa ibabaw sa naparot nga bungtod. Mingaw kaayo ang maong dapit kay layo kini og mga balay.

Giparaygan ni Bert si Karlyn. Gipaundayonan lang usab ni Karlyn si Bert nga miparayeg pag-ayo kaniya. Nag-ukobay dayon ang masig nila ka mga ngabil sa mainiton nga pagparayganay.

Takulahaw lang nga nadala sila sa kainit sa ilang mga pagbati. “Dili nako maagwanta ang akong gibati Karlyn.” “Unsay buot mo nga ipasabot?”

Gipanghiram ni Bert ang kalawasan sa dalaga nga nakapasamot sa kainit sa ilang mga pagbati. “Duna ko’y plastic rain coat nga anaa sa U-box sa akong motor, akong kuhaon aron mahigdaan nato dinhi sa bermuda.

Wala na motingog si Karlyn mao nga dali kaayo si Bert nga nakakuha sa iyang plastic rain coat. Gihanig dayon niya sa daw sagbot nga bermuda nga nanubo.

Una nga milingkod si Bert sa gihapin niya nga rain coat, dayon gihinay niya pagbira si Karlyn. Gipadayon nila ang pagparayganay. Mikilab lang ang mga gutlo hangtod nga gianod gayud sila sa sulog sa mga pagbati.

“Nahadlok ko sa sangpotan ani Bert apan andam nako nga atubangon ang kapakyasan kun mahitabo nga imo ra ko nga binuangan. Imo na ako karon Bert. Tingali usa ko sa imong mga secret admirers,” ni Karlyn pa nga naghangos.

Bisan sa kabugnaw sa kaadlawon, apan mihari sa ilang kalawasan ang kainit sa ilang mga pagbati mao nga pareho silang duha nga gidunghayan sa daghang singot.

Alas kwatro na sa kaadlawon nga gihatud ni Bert si Karlyn. “Ayaw kabalaka, dia koy yawe. Sigi Bert Merry Christmas and hope to see you once again,” matud ni Karlyn sa dayong sulod niya sa gamay’ng pultahan sa gate. (Kataposan)