Mogula matag Biyernes Kasinatian batok diploma

Alas 10:00 sa buntag. Sabado. Nag-abot ang mga managsoong nagkabangi, sa session hall sa barangay Otabalo sakop sa lungsod sa Nivedita amihanang Sugbo. Nanglingkod ang complain-ant, si Bella ug iyang mga testigos nga sila si Alvin, iyang kapikas nga Amerkano, Dindo, ug Roger, libut sa kasadpang tumoy sa dako ug halapad nga lamesa.

Si Dante nga manghod ni Bella, mao ang respondent. Nilingkod dapit sa silangang tumoy sa lamesa. Kini ang unang barangay conciliation nga natakda ining barangaya sa tuig 2012. Tulo ka barangay officials, sakop sa Lupong Tagapayapa ang nitambong sa husay. Si Kapitan Hector Roble, isip Lupon Chairman; si Walter, Lupon member ug si Edna, Lupon member/konsehal ug sekretarya sa Kapitan. Naglaray sila’g lingkod dapit sa tunga sa lamesa habig sa amihan.

“Maayong buntag kaninyong tanan. Nia ta magkatigum karong buntaga kay gusto ta’g husay. Kay kun dunay di gusto’g husay,dili angay motambong. Kay nia man tanan karon ang nikiha ug ang gikiha, may purohan tang mahusay. Kay kun di mo mahusay, moisyu lang mi’g Certificate To File Action aron sa husgado namo magtiwas og husay” sa kapitan nga mapahiyomon. Gitagsatagsa niya’g eyeball ang mga nanambong. “Ikaw na lay bahalang mo-Iningles Bella, sa akong gisulti, aron kasabot imong bana” dugang niya. Gihonghongan lang ni Bella si Alvin sa wala niya. “Paminawon namo unsay isulti sa complainant” sa kapitan.

May gipatukod bunggalo si Bella sa ilang baryo, sa luna nga bakilid ug nag-umbaw sa baybayon dapit sa silangan. Si Dante ang gipahimo sa desinyo sa balay kay graduwado man siya’g Civil Engineering ug nagtrabaho sa usa ka construction company sa siyudad. Ang mga panday, pinili ni Bella ug rekomendado nilang Roger ug Dante. Usa sa mga panday si Peter nga wa kahuman og elementarya. Mao pa gyuy foreman. Grade five lang kutob ug wa gani kahuman. Sobra diyes anyos na nga panday unya maayong laki kono. Round kono ang abilidad. Kamao kono tanan sa pagtrabaho sa semento, kahoy, puthaw ug sheet metal. Kay tinudloan sa amahan.

Dihang hapit na mahuman ang balay, niundang si Dante og supervise sa construction. Kay gikabangi niya si Peter. Dili motahod sa iyang mando kun unsaon pagpanday ang delikadong desinyo dapit sa lawak ug sala sa balay. Nisipsip si Peter nilang Roger ug Dindo nga kaisparing niya’g inom kada Sabado. Nagkahiusa silang isumbong ni Bella ug Alvin nga sayop kono ang instruction ni Dante. Puwerteng sukoa ni Dante kay iparang lang kono siya’g grade five nga ang abilidad kasinatian lang, batok niya nga may diploma ug lisensiya na lay kulang.

Si Bella nga usa ka CPA, naminyo ni Alvin nga dunay paktori og Pizza sa Kansas, USA. Wa sila’y anak. Maong gibaling nalang ni Bella iyang pagtagad sa tulo niya ka mga manghud ug sa ilang mga anak. Gipatukoran niya og balay iyang tulo ka manghod daplin sa barangay road.

Wa kauyon ang Amerkano sa resulta sa construction. Gibasol nila si Dante. Pabayaron og danyos kun dili usbon ang wa na nasubay sa desinyo. “Unsa may imong ikasulti, Dante?’ sa kapitan. “Una sa tanan, dili ko angay mabasol sa hitabo. Kay wa nituman sa akong mando ang panday. Ikaduha, wa koy kuwarta ikabayad. Mangutang pa man gani ko’g igasto para sa akong review ug board exams” ni Dante. “Wa ba moy laing ikasugyot? Bag-ong Tuig pa baya ron. Nanimaho pa ang espiritu sa Paskong nilabay. Managsoon, angay lang maghuyhoy. Di angay maminaw sa intriga sa taga gawas nga gusto lang manggubot sa malinawong relasyon sa managsoon. Kay puwede man tingali usbon ang trabaho aron matuman ang desinyo?” sa kapitan. “Ok, mi Kap. Kun usbon ang tipik sa balay nga wa mauyoni sa akong bana” ni Bella. Nilingi ang kapitan ngadtong Dante. “Okay ko motrabaho pag-usab. Basta akoy mopili sa panday. Manghuwam kos empleyado sa kompanya sa akong amo,” ni Dante.”Naa ra man diay na. Ed, dokdoka ang kasabutan sa computer. Kay pirmahan natong tanan,” sa kapitan. Nagpahiyom. “Merry Christmas ug Happy New Year natong tanan,” dugang niya. Nakaginhawa’g luag si Dante.

Nagkauli ang kabubut-on sa managsoon ug managbayaw. Naglamanohay silang tanan ning unang semana sa Bag-ong Tuig. (Kataposan) (Sa magbabasang gusto’g libreng konsulta, dad-a ning pahina sa opisina sa tagsulat. Iatol og Sabado sa buntag)