Usa ka Adlaw sa Tuig 2050

Gula 4

Nahimuot si Propesor Jack Armstrong nga nagtan-aw sa monitoring screen nga iyang gitamdan. Milampos si R-7007 sa misyon nga iyang gisangon niini. Nakita niya ang pagkabungkag sa Gold Palace nga gipuy-an ni Presidente Gil Best ug Diana. Wala makahimo sa pagpanalipod ang mga sinaligang mga tawo sa pamuno sa gibuhat sa robot nga nagpakatangke de giyera nga misulod sa palasyo.

Milanog ang makusog nga katawa sa kadaogan ni Propesor Jack Armstrong sulod sa seradong laboratoryo nga iyang nahimutangan. Natuman na gayod ang dugay na niyang gipanganting panimalos ngadto sa presidente nga giisip niyang higpit nga kaaway. Naseguro niya nga dungan sa pagkagun-ob sa palasyo, napulpog usab ang mga lawas nila ni Gil ug Diana ug ingon man ang mga hinanib niini. Karon wala na gayoy makasanta sa iyang mga plano. Siya nay ilhon nga labing gamhanan sa tibuok kalibotan ug ang iyang tingog mao nay balaod nga tahoron sa katawhan.

“R-7007,” matud ni Propesor Jack Armstrong nga sama sa nakigsulti sa robot nga milutaw sa monitoring screen sa iyang atubangan,” balik na diri sa Golden Eye.”

Nakita ni Propesor Armstrong nga gikan sa pagka-tangke de giyera, inanay nga nausab ang bayhon ni R-7007. Nahimo na kining usa ka air craft. Ug tulin kining milupad paingon sa Golden Eye. -- Sumpayan pa