Dunay lain

Dear Tita Salie,

Maayong adlaw. Ako si Cris, taga Moalboal ug usa ka security guard sa usa ka resort.

Duna koy anak nga 3 na ka tuig ang edad. Dili pa ko minyo apan dunay ka-live in nga 3 na ka tuig kapin. Gusto na gyod sa akong kapuyo nga magpakasal na mi. Apan wala pa ko mosugot, tungod kay wala koy plano nga magpakasal niya kay aduna koy laing pakaslan. Mora man gud og nahanaw ang akong gugma kaniya.,

Naa man god koy nauyab nga taga Manila, Tita, sa text lang mi nagkaila ug sa text usab kami nagkauyab. Unya nagkitaay mi sa Facebook ug ganahan kaayo ko niya. Two years na ang among relasyon. Ako na siyang gisultian nga duna koy anak ug aduna koy ka-live in. Misugot ra siya niini ug matud niya nga as long na love nako siya walay problema.

Nagsabot na mi nga magminyo ug siya ang moanhi sa Cebu kay dili man ko mosugot nga ako ang moadto sa Manila kay wala koy kaila didto ug wala koy kapuy-an. Mahadlok usab ako nga tingali og unsaon ko didto.

Karon dili na moila nako nga amahan ang akong anak. Matud pa sa akong kapuyo nga maghikog kuno siya kun magminyo ko sa lain. Ug ako gyod kuno ang basolon sa iyang kamatayon. Nahigugma man gyod ko sa akong uyab nga taga Manila, Tita. Unsa may akong buhaton? Palihog pasabta ko. Daghang salamat sa pagtagad. -- Cris

* * *

Maayong adlaw Cris,

 Ang matuod nga lalaki dili ang isug ug daghan ang gikulata o gipatay. Dili ang daghan og uyab ug babaye nga gipabuntisan. Dili usab ang mga dagko og lawas ug gikahadlokan sa tanan. Ang lalaki bisan kun siya daot ug morag way kusog kun kamao siya moatubang sa tanang pagsulay nga mosuway pagtumpag sa iyang pagkatawo maoy tinuod nga lalaki. Ang tinuod nga lalaki makamao manalipod sa iyang gugma ug sa babaye nga iyang gimahal sa panahon nga siya tentalon. Ang tinuod nga lalaki dunay katakos nga mosulti nga “dili na ko puyde, o kaha minyo na ko” kun adunay gwapa ug sexy nga babaye nga mosuway pagdani kaniya.

Busa, kun tinuod ka nga lalaki barogi ang imong nasugdan na nga pamilya. Ayaw gub-a ang guba nang daan nga kinabuhi sa imong kapuyo karon. Hunahunaa lamang kun imo pa siyang talikdan, ug imong binlan og anak. Maglisod na siya pagsugod og bag-ong relasyon kay imo namang giguba ang iyang pagkatawo dihang imo siyang gipamabdosan. Hunahunaa usab ang imong anak, kun tinuod ka nga imo siyang giilang anak, dili unta ingon niana kasayon nimo nga ibaylo ngadto sa tawo nga bisan anino wala pa gyod nimo makit-i.

Hunahuna og maayo aron wala kay basulan sa kinabuhi kay tingali unya kun human nimo sila gibiyaan tungod nianang imong uyab, basin manuktok ka og balik sa ilang pultahan. Dili ka kaha maulaw sa imong anak? -- Tita Salie