Suhi

Gula 7

Gipataypatay niya ang iyang lawas sa pagpakigbugno sa yuta. Naningkamot siya pag-ayo aron makahatag og masaarong kaugmaon sa ilang mga anak. Gusto siya nga makatapos og kurso ang tulo ka anak nilang Rose aron dili sila makatagamtam sa kalisod sa kinabuhi nga sama sa natagamtaman nilang mga ginikanan. Gipatuman niya sulod ug gawas sa panimalay ang disiplina. Apan may mipalahi ug nagmatukolon kaniya -- si Ramil.

Nakaingon hinuon si Pepe nga bakakon kadtong mananabang nga maoy nagpahimugso kang Ramil. Natawo si Ramil nga suhi. Matud pa sa mananabang, ang bata nga suhi mahimong batid nga manghihilot inigka dako na niini. Apan sukwahi ang nahitabo kang Ramil. Nahimo hinuon kining badlongon ug hilotonon sa mga ginikanan ang kinaiya.

Mao gayo’y pagsugod sa ikaduhang misa ni Padre Giovani Collantes sa ilang paghiabot sa simbahan. Silang mga sakop sa lagyo turnohay sa pag-abag sa pari sa pagpahigayon sa Santos nga misa. Karong Domingoha, turno nila ni Lucas Gomez ug Marcos Misola ang misa sa buntag. Sa misa sa hapon, sila si Pablo Bernales ug Mario Hubac ang mosilbi. Sa sunod Domingo pa ang turno ni Pepe. Apan bisan wala siya’y obligasyon sa simbahan karong Domingoha, misimba gihapon siya. Nabatasan na niya ang pagsimba matag Domingo uban ang mga sakop sa pamilya. -- Sumpayan pa