Walay gugma

Dear Tita Salie,

Maayong adlaw. Tagoa lang ko sa pangalan nga Mr. D, 21 years of age. minyoonon. Ang akong problema kabahin kini sa akong sitwasyon karon ug manghinaut lang ko, Tita, nga imong malamdagan ang akong hunahuna.

Nabuntis man god nako kining akong girlfriend nga wala koy gugma. Tinuod nga ako ang amahan sa iyang gisabak karon apan dili ko seryoso sa akong pakigrelasyon niya. Nag-sex mi pero gusto lang ko nga malipay ug nadala lang ko sa kainit sa lawas.

Apan tungod lagi kay nakasala ko sa akong uyab ug mabdos na siya karon gipugos ko sa iyang mga ginikanan ug uban sa sugyot sa akong mga ginikanan. Apan sukad pa sa una wala man gyod koy gugma niining babayhana.

Duna koy laing uyab nga mao gyod ang tinuod kong gihigugma. Ug siya gyod ang akong gusto nga maoy akong dad-on sa altar sa kaminyoon. Ug madawat ra niya nga aduna koy umaabot nga anak.

Magpakasal kaha gyod ko sa akong uyab nga nabuntis bisan kun wala gyod koy gugma kaniya? Malipayon kaha ang akong kaminyoon kun napugos lang ko sa akong pangasaw-onon? Palihog pasabta ko. Daghang salamat and more power.

-- Mr. D.

* * *

Maayong adlaw Mr. D.,

Walay laing hinungdan nganong minyoon o nganong magminyo ang lalaki ug babaye gawas sa gugma. Gugma ra gyod ang magtukmod kanila ngadto sa altar sa kaminyoon. Mao bitaw nga atol sa kasal, huwes man o simbahan mangutana gyod ang nagkasal kun inyo bang kabubut-on ang magpakasal. Pangutan-on usab ang lalaki ug babaye nga magpakasal kun ila bang dawaton ang usa’g-usa nga mamahimo nilang kapikas sa kinabuhi.

Mao nga dapat ang magpakasal nagkahigugmaay gyod sa usa’g-usa ug wala mapugos sa pagpakasal. Busa, alang kanako dili maayong hinungdan ang pagkabuntis sa babaye aron mahitabo ang kasal o pagminyo kay mas dako kaayo ang problema ang umaabot sa ilang pamilya kun napugos lamang sila sa ilang kaminyoon. Dapat gawasnon kamong modesisyon alang niining butanga aron walay mga anak nga mag-antos sa umaabot. Kun wala kay gugma ayaw nalang padayona kay luoy lang unya ang imong asawa.

Apan tungod kay nakasala ka man nianang imong uyab tabangi siya sa iyang kahimtang ilabi na sa iyang pagpanganak ug ang pagpadako sa bata. Ayaw gyod siya og pasagdi ipakita ang imong tinuod nga pagkalalaki.

Walay makapugos kanimo sa pagpakasal kay puyde ka gayod mobalibad o modili ngadto sa atubangan sa huwes o pari.

-- Tita Salie