Usa ka Adlaw sa Tuig 2050

Gula 2

Ang kasilag ni Propesor Jack Armstrong ngadto kang Gil Best misamot pagsilaob sa dihang nakatapos na sila sa ilang pagtuon. Si Best maoy napiling magna cum laude sa ilang tunghaan ug siya summa cum laude lamang. Gisulsolan sa kasina ang iyang kasingkasing. Pun-an pa sa dihang nagminyo na gayod sila si Gil ug Diana, si Jack Armstrong nahisama sa usa ka mabangis nga mananap nga giilogan sa iyang tukbonon. Nanumpa siya sa iyang kaugalingon nga dili niya hatagan og kalinaw ang pagpuyo sa duha.

Nunot sa kusog nga buylo sa pag-uswag sa kinaadman sa tawo, nahimong gumaran sa modernong kalibotan ang gahom sa kompyuter. Ang Acerima mao nay giilang labing gamhanang nasud sa tibuok kalibotan nga nagkolonisar sa daghang kanasoran. Si Gil Best napili nga pamuno sa maong nasod nga maoy mibanos paglingkod sa trono sa tigulang nang presidente. Nagustohan si Best sa katawhan gumikan sa dalaygon niyang binuhatan.

Dinhi misamot pagdilaab ang kasilag ni Propesor Jack Armstrong kang Gil Best. Dili siya makadawat sa kamatuoran nga si Best mao nay ilhon nga labing gamhanan sa tibuok kalibotan. Kinahanglan nga siya gayod maoy ilhon nga gamhanan ug manghapa ang tanang katawhan sa iyang tiilan. -- Sumpayan pa