Ang asawa niyang mangtas

Malipayon kaayo si Simon sa ilang kaminyoon ni Zulita kay gawas nga guwapa kini, bright ug utokan pa gyud kay migraduwar man kini nga suma cum laude sa kolehiyo. Sukad mamatay ang mga ginikanan ni Zulita ingon sa talagsa na lang kini moduaw didto sa ilang dapit sa lungsod sa Barbuela.

Mga adunahan og kaliwat sila si Zulita ug duha lang silang managsuon, si Engrico nga tua na manimuyo sa Amerika kauban sa asawa niining Amerikana.

Ug karon ning panagluon sa salag sa kaminyoon nilang Simon ug Zulita gusto gyud lagi nila nga makabaton dayon og anak ug bisag duha lang gud ka buok kay mao man kini gusto pud nilang duha. Ning ilang pagpuyo wala sila’y problema sa ilang pang-ekonomiya kay si Zulita aduna may nasunod nga negosyo sa iyang mga ginikanan ug si Simon usab dunay dakong panagatan didto sa Palawan.

Ug kay hilig lagi og resthouse nga naa gyud mahimutang sa daplin sa baybayon maong nakapalit sila’g yuta nga gipanag-iya sa usa ka insek nga dato ug wala dangtig dugay natukoran dayon kini nila’g usa ka matahom kaayong resthouse nga nag-umbaw sa dagat.

“Gusto ko, Simon, nga matag hapon molahos ko dinhi ug anhi ko magpahayahay,” ni Zulita pa nga mipahayag ngadto sa iyang bana dihang nakahapit silang duha sa rest house.

“Aw, o, pero, kinahanglan nga kuyogan ko ikaw, Honey, kay sayod ka na karon sa panahon daghang mga daotang tawo. Mingaw baya ning dapita. Busa, inig pauli nimo gikan sa trabaho tawagi lang ko sa cellphone, okey?” ni Simon pa ngadto sa guwapa niyang asawa.

“Okey,” tubag ni Zulita nga may pahiyom ang mga ngabil.

Unya usa ka hapon dihang mihapit sila sa ilang resthouse wala nila damha nga gisulod sila’g unom ka tawo ug ang tuyo niini mao ang pagtulis kanila, apan sa wala pa nila kuhaa ang dala nilang kuwarta ug mga alahas gihuboan sa mga daotang tawo si Zulita ug ilang gimandoan sa pagsayaw.

Aron way mahitabo kang Simon nga gitionan ang ulo sa pistola sa usa sa mga tulisan, misayaw na lang si Zulita nga hubo nunot sa gipatugtog nga stereo. Nagpanilap ang mga tulisan nga nagtan-aw kang Zulita nga mamolds kaayo ang lawas nga mikiay-kiay ug way sapot ang tibuok kalawasan.

“Maluoy tawon mo namo, ayaw mi ninyo’g ingna ini,” nagpakiluoy si Simon. Unya, mihangyo siya sa leader sa mga tulisan nga pahunongon na si Zulita sa pagsayaw. Apan igo lang mikatawa ang bagis.

“He, he, he, he, unsa to, pahunongon? Uy, karon dayon pakit-on tika mismo nga angkonon ko na ang nindot kaayong lawas sa imong asawa, he, he, he, lamia’g lawas niining bayhana, uy,” ug unya mihubo kini sa sinina ug karsones ug iyang giduol ang nagpadayon pagsayaw nga si Zulita.

Apan naunsa ba nga mikatawa man hinuon si Zulita ug unya kalit lang nahimong usa ka dakong iro. Unya bangis kaayo kining mibugno ug mikuniskunis sa mga tulisan.

Ug si Simon nga nakasaksi ingon sa wala makatuo. Giinom pa sa dakong iro nga mangtas ang dugo sa mga tulisan pinaagi sa paglala sa mibanaw’ng mga dugo diha sa salog.

“Honey, Simon, ako ang midawat sa pagka-ungo sa namatay nakong mga ginikanan. Oo, salamat na lang kay nakatabang kaayo kini kanato, kay kun wala pa kining maong gahoma, lagmit patay na tang duha,” ni Zulita pa nga nahibalik na sa pagka-normal nga tawo ug dili na usab usa ka mangtas nga iro. Dinhi wala lang gihapon makatingog si Simon. (Kataposan)