Balik sa gibiyaan nga kalibotan

Gula 61

Lawom nang gabii sa iyang paghiabot sa balangay sa Lumangog. Wala nay timik ang kabalayan. May tagok ang kahilom nga mihabol sa kalikopan. Bagtok ang kangitngit. Mora’g gibugwakan sa laway sa kugita ang palibot.

May milumpat sa iyang kahiladman. Mora’g giduyan ang iyang kaugalingon sa dili masabot nga pagbati dihang duol na siya sa ilang pinuy-anan. Malantaw na niya ang siga sa kingking buntagan nga milusot sa lungag sa bungbong sa kabos nilang pinuy-anan. Milagsik ang iyang mga tiil. Ang kahinangop nga makita ang mga mahal niya sa kinabuhi nahimong mga pako nga nagsapwang sa iyang mga lakang.

Apan unya, kalit siyang napahunong. Dili layo sa ilang balay nakalantaw siya’g kidlap sa kahayag. Midali siya paghiklin sa iyang kaugalingon. Mitago siya sa bagang kasagbotan sa daplin sa dalan dihang iyang nasuta nga siga sa plaslayit ang tinubdan sa maong kahayag. Milab-as sa iyang panumdoman kadtong hitabo diin nahiagom siya sa kabangis sa mga sundalo nga iyang nasugatan sa iyang pagtungas sa bukid. Milublob siya sa hulpa sa yuta. Wala gayod siya maglihok.

Nagkaduol ang kahayag sa iyang nahimutangan. Nagpagamay-gamay gayod siya sa iyang kaugalingon. Ang kakulba mikupog og maayo sa iyang dughan. Wala madugay, nakabati siya’g mga tunob nga nagsingabot. Hapit na lang niya pugngan ang iyang pagginhawa aron dili siya mamatikdan sa mga tawo nga nagsingabot sa iyang nahimutangan.

Nangatawa ang mga tawo nga miagi sa tungod sa iyang gitagoan. Misanting ang iyang mga dalunggan. Mora’g naglukim og kantalita ang ilang kinataw-an. Pero wala siya makasabot sa ilang gipanag-sultihan.

Dihang misaylo na sila sa iyang nahimutangan, gipagimaw niya ang iyang ulo sa kasagbotan. Migawas siya sa iyang gitagoan human natino nga layo na ang mga tawo kaniya. Ang kakulba sa iyang dughan wala pa mohuwas. Lain ang iyang gibati. Gipaspasan niya ang paglakaw. Gusto na niyang mahangop ang iyang asawa ug anak. -- Tapuson sunod gula