Balik sa gibiyaan nga kalibotan

Gula 60

Mobalik siya ngadto sa mga binuhat nga iyang gimahal. Ang mga binuhat nga duol kaayo sa iyang dughan. May laraw nga gigambalay ang iyang hunahuna alang kanila. Molalin sila sa layong dapit. Sa dapit nga wala’y nakaila kanila. Adto nila umolon pagbalik ang nabungkag nilang banay. Adto niya puy-i ang kalinaw nga ingon sa may hulga na sa pagtungina niining mamingaw nga lasang.

Mihinay siya paglakang aron sugdan ang taas nga panaw. Apan didto sa unahan mihunong siya. Milingi sa iyang agi. Gisud-ong pagbalik ang payag nga daw anino na lamang sa kagabhion nga nagtungkawo niadtong dapita sa lasang. Dihay kawili nga mihawid sa iyang balatian. Ang payag nahimong tipik sa iyang kinabuhi sa daklit nga higayon. Apan kinahanglan nga iyang talikdan ang maong lagkaw. Namatikdan niya nga ang daob sa tugkaran sa payag nag-anam nag ka awop.

Mipadayon na siya paglakaw. Gipatuskig niya ang iyang liog. Dili na siya gustong molingi sa iyang gigikanan. Sa payag. Bug-os na ang iyang hukom sa pagbiya sa maong dapita. Napaghikit-an niya nga hapit na mahulog ang espada ni Damocles nga nagbitay sa tungod sa maong lasang.

Igo lamang ang gikusgon sa iyang paglakaw. Nakahatag og kakulian sa iyang pagbaktas ang kangitngit sa kalibotan. Nakadugang sa kahinay sa iyang mga lakang ang kasakit sa mga samad sa iyang mga tiil nga wala nay sapin. Labina kay dili klarong dalan ang iyang gisubay. Ingon sa handumanan lamang kini sa nabuning mga tunob nga gibilin sa langyaw’ng mga tiil sa gilawa-lawaan nang panahon.

Midulhog siya sa bakilid nga kugonon. Pag-abot niya sa ubos nga bahin sa bukid, misangko siya sa dalandalan nga mugna lang sa tiil sa mga tawo. Tuyhad siyang milakaw. Wala na kaayo siya magdaphag sa kangitngit. May bulto na ang hawan nga dalandalan nga maaninag sa iyang panan-aw.

Paghisaylo niya sa usa ka lugot, kalit lang milabok ang kakulba sa iyang dughan. Wala niya hisabti ang lintunganay sa maong pagbati. Namangon ang mga balhibo sa iyang bukton. Daw gigitik ang iyang tangkugo. May pagbati siya nga daw may mga mata nga nagtan-aw kaniya. Pero wala siya dutli sa kahadlok.

Dihay aninipot nga misapigad sa iyang handurawan. Milakdop sa iyang hunahuna ang mga rebelde sa bukid. Wala kaha sila makamatikod sa iyang pagbiya sa bukid sa Kaandis? Nanuktok ang maong pangutana sa iyang kahiladman. Apan dili na siya gustong maghunahuna kanila. Mipadayon siya paglakaw. Apan ang kakulba nagyunyon gihapon sa iyang dughan. -- Sumpayan pa