Ganahan sa lalaki ug babaye

Dear Tita Salie,

Hello, Tita ug maayong adlaw kanimo. Just call me J.L. 18 years of age and still single.

Wala lang ko kasabot sa akong kaugalingon mao nga mangayo ko kanimo sa imong pamahayag. Kay usahay mora man ko og abnormal sa akong tan-aw.

High school pa lang ako duna nako’y crush nga akong classmate, syempre usa ka lalaki. Magkaduol lang gani mi mora og manindog ang akong balhibo. Kun itupotupo ming duha sa akong mga classmate kiligon dayon ko, Tita, mora’g in-love gyod ko niya.

Apan ako usab nga nabantayan nga naibog usab ako sa akong school mate, naa siya sa pikas nga section. Apan ang akong problema kay parehas man siya nako nga babaye. Bisan unsaon nako paghunahuna dili gyod ko kasabot kun nganong ingon ani ang akong na-feel sa akong schoolmate nga babaye man usab siya. Morag dili gyod ko normal, Tita, kay ganahan man ko sa lalaki ug babaye. Does it mean nga bisexual nako, Tita? Palihog pasabta ko. Daghang salamat sa pagtagad and more power. -- J.L.

* * *

Dear J.L.,

Duna gayo’y mga tawo nga susama sa imong kahimtang. Apan ayaw usa paghukom nga bisexual ka or kaha abnormal ka. Imo usang tun-an ang imong bation sa duha ka managlahing binuhat nga mao ang babaye ug lalaki. Kay adunay daghang mga kaso nga abi nato og gugma ang atong gibati sa usa ka tawo apan lahi diay ang atong gusto. Imong tan-awon kun unsang klaseha sa gana ang gusto nimo sa imong classmate nga lalaki kun apil ba niini ang lust ug biga. Unya imo usab nga tun-an ang gana nga anaa sa imong schoolmate nga pareha kanimo usa ka babaye. Kun ganahan ra ba ka nga kauban siya aron duna kay kaestorya, o ganahan ka niya isip imong igsuon. Kay adunay uban nga ganahan ra sila sa tawo nga ikaestorya lang apan walay gugma mao kanang dali ra silang pul-an.

Love has many faces matud pa nila. Busa, imong tan-awon kun romantic or sexual love gyod ang imong na-feel nilang duha mao na kanang higayona nga moingon ka nga bisexual ka. -- Tita Salie