Dili mosugot si Mama

Dear Tita Salie,

Hello, Tita ug kumosta ang imong life karon? I hope wala kay problema kay motabang ra ba ka og tambag sa among mga suliran.

Tawga lang ko sa pangalan nga Ms. A., usa ka dalaga ug wala pay uyab apan dunay nakagusto nako pero estoryahonon pa.

Dunay nanguyab nako karon, Tita. wala gyod untay problema kay gawasnon man siya. Although taas-taas ang iyang edad apan alang kanako puyde ra kay nasayod ko nga maayo ang akong kinabuhi uban niining lalakiha.

Usa ka byudo ang nakagusto kanako. Nipasalig siya nga iyang ihatag kanako kun unsay akong gusto. Mapinanggaon baya siya kanako. Mora gyod siya og akong papa. Apan ang problema kay dili man uyon ang akong mama nga makigminyo ko niining lalakiha kay kuno dako na og edad. Apan alang kanako maayo gyod ang akong kaugmaon uban kaniya kay duna man siya’y kaya sa kinabuhi.

Naglibog ko, Tita, kun kinsay akong sundon. Si mama ba o kining biyudo nga makahatag kanako og maayong kaugmaon? Palihog pasabta ko. Thank you very much.

 -- Ms. A.

* * *

Dear Ms. A,

Wala kamo nagkauyon sa imong inahan mahitungod nianang butanga. Dili parehas ang inyong hukom tungod kay managlahi usab ang inyong objective o tumong sa pagsulod sa kinabuhing minyo.

Siguro mahadlok ang imong mama nga unyag dili kamo magkasinabot tungod kay dako-dako ang agwat sa inyong edad. Nahadlok siya kay bata ka pa og hunahuna samtang ang lalaki matured na. Basin unya og dili ka masabtan sa imong kinaiya tungod kay bata ka pa ug tingali’g magsige na lang mo og away. Ang iyang hukom basi kana sa iyang kasinatian sa kinabuhing minyo. Para kaniya mas maayo pa ang walay kwarta basta malinawon ang pamilya. Matud pa sa atong panultihon “bahala’g ginamos basta ang gugma tim-os” mag-unsa man ang kanunay adobo pero perming molagobo.”

Ang imo usab nga tumong nganong mosugot ka sa maong lalaki tungod kay dili ka gusto sa kinabuhi nga lisod sa kwarta. Tingali kun maoy imong nakita sa inyong pamilya nga kanunay kapos sa kuwarta ang imong mama ug papa ug dili ka gusto nga imo usab kining masinati sa imong kaminyoon.

Aduna usab silay giingon nga “age doesn’t matter” tinuod kini apan siguradoa usab nga duna kay gugma kaniya. Unsaon nalang kun wala na unya siya’y kwarta, imo nalang siyang biyaan kay wala man kay gugma. Ang kaminyoon, Ms. A., balansi. Anaa ang gugma, dapat dunay income aron dili kaayo lisod ang pamilya, anaa ang respeto pagsabot ug pagtinabangay.

 -- Tita Salie