Maunongon Ang Gugma

Gula 101

Nahugno ang paglaom ni Mr. Mercado.

Gumikan sa wala damhang kalamboan sa mga panghitabo, gi-review sa korte ang kaso ni Jeffrey. Milutaw si Nang Naring, ang silingan ni Gemma Roca, aron pagsaksi atubangan sa korte nga si Brandon Mercado maoy matuod nga naglugos ug nagpatay sa dalaga.

Lakip si Col. Noot mi-testify usab nga siya mismo nakadungog sa pag-angkon ni Brandon Mercado nga kini ang nagpatay kang Gemma Roca. Nalimpiyo gayod ni Jeffrey sa hingpit ang iyang ngalan nga sa makadiyot nahugawan sa krimen nga wala niya mabuhat. Nakapasalamat siya sa Dios.

Gihagad siya ni Col. Noot nga mobalik sa serbisyo isip usa ka polis apan mibalibad siya. Gusto siyang magpuyo na lang isip yanong lungsoranon.

“Nalipay ko nga natapos na gyud ang akong pagpakigbisog,” nagkanayon si Jeffrey dihang nagkasulti sila si Danica sa gawas sa buhatan ni Col. Noot.

“Hasta sab ko nalipay niining hitaboa,” matud ni Danica. “Karon nga nahibalik na sa normal ang imong kinabuhi, panahon na tingali nga mobalik na ko sa poder sa akong mga ginikanan.”

“Kuyogan tikaw,” matud ni Jeffrey.”

“Ayaw na lang,” ni Danica pa. -- Sumpayan pa