Wala kami tingganay nga namahaw si Andy. Bisag wala ko’y maayong buot kaniya apan nagluto ko alang sa pamahaw kay aduna man siya’y trabaho. Usa ka office worker si Andy, nakahuman siya sa Business Administration. Samtang ako wala makahuman sa kolehiyo kay napamabdosan man ko niya maong nagminyo kami. Maguwang nako’g tulo ka tuig si Andy.
Gamay ra ang gikaon sa akong bana, milakaw siya nga wala mananghid kanako.
“Unsay ako!” Nagbagutbot ko.
Nag-abang kami’g one-door apartment sa siyudad. Dako’g suweldo si Andy. Gawas niini, anak siya og adunahan ug bugtong anak. Gipatukoran kami’g balay sa iyang mga ginikanan sa Banilad. Hapit na kini mahuman karon.
Miadto ko sa biyuda kong inahan, si Reena, sa Mabolo. Karaan na ang balay sa akong mga ginikanan, usa ka magtutudlo si mama Reena sa publikong tulunghaan sa Mabolo. Tulo ka tuig na nga namatay si papa, atake sa kasingkasing. Nakuha ni mama ang mga benepisyo ni papa sa gitrabahoang kompaniya.
Gikugos dayon ni mama Reena ang among anak ni Andy nga usa ka tuig ang edad. Lalaki ang among anak ni Andy. Sabado niadtong adlawa, wala’y trabaho si mama.
“Kaguwapo sa akong apo, uy!”
Nalingaw ko kang mama nga naghagwa sa bata. Iya kining gipakatulog. Unya gipahigda ni mama ang bata sa kama sa iyang kuwarto. Nakigsulti siya kanako sa sala.
“Nganong nanghubag man nang imong mga mata, Katherine?”
Nanghupaw ko. Dayon gisugid ko sa akong inahan ang among panaglalis ni Andy kagabii.
“Kagabii pa ba kini mahitabo, Katherine?”
“Kadaghan na, Ma. Unsaon, kanunay siyang lawom nang gabii nga mopauli. Kanunay overtime ang iyang rason. Daghan kuno siya’g mga gimbuhaton sa opisina kay naghinapos na ang tuig.” Kahilakon na sab ko apan gipugngan ko ang akong kaugalingon.
“Basig tinuod sab ang iyang gisulti, Katherine? Tinuod man sab nga daghan ang buhatonon sa sulod sa opisina kun hapit na mahuman ang tuig.”
“Ambot ba, Ma, uy. Basig dunay laing babaye si Andy. Dili na man gani siya magtalinga nako panahon sa gabii bisag bag-o kong kaligo ug nagpahumot.”
Mikatawa si mama. Naglingolingo.
“Ayaw pasagdi nga magpadayon kini, Katherine. Abi nimo, ang sekswal sa magtiayon gikinahanglan kaayo, may edad na o mabatan-on. Ang sekswal maoy magsukod sa gugma ug respeto sa usa’g-usa. Kun wala kini, nahanaw na sab ang gugma ug respeto. Ang buot ipasabot, kun ang asawa o kaha ang bana dili na magtalingawa sa maong buhat, wala na siya’y gugma ug respeto sa iyang partner.”
Nahilom ko. Gikulbaan ko pag-ayo. Dili ko gusto nga mahanaw ang respeto ug gugma ni Andy kanako kay gimahal ko kaayo siya.
“Pagsinabtanay ang gikinahanglan sa magtiayon diha sa panagpuyo, Katherine, aron molungtad ang gugma, respeto ug pagbinatiay sa magtiayon sa usa’g-usa.”
Pagka gabii, nag-andam ko’g mga sud-an nga paborito ni Andy. Gihagoan ko kini sa pagluto. Ug pag-abot ni Andy gisugat ko siya ug gihagkan. Gipahiyoman ko siya. Mipahiyom na usab siya kanako. Iya kong gigakos ug gihagkan sa mga ngabil.
Niadtong gabhiona malipayon ako sa kiliran sa akong bana. (Kataposan)