Balik sa gibiyaan nga kalibotan

Gula 54

Gipadayon niya ang paghimo’g dalandalan sa taliwala sa lasang. Hangtod nga nahisangko siya sa dapit diin may mahabog nga pangpang. Dili layo sa pangpang nagbarog ang usa ka punoan sa lubi. Nasuta niya nga dili maayo ang pagtubo sa maong tanom. Wala kini makaugpo sa awong sa mga sagbot ug kahoy nga naglambungay ang mga dahon. Apan nakita niya nga nakigbisog sa pagpakabuhi ang maong tanom. Milugos kini pagpabuklad sa luspad nga mga dahon. Nakahimo pa gani kini pagpahimugso og mga bunga -- nga giato lang usab sa mga unggoy sa lasang.

Nahuso ang usa ka hukom nga mihuot sa iyang hunahuna samtang nagsud-ong sa makaluluoy’ng kahimtang sa lubi. Gusto niyang hawanan sa mga kahoy ug sagbot ang nahilun-an niini. Nagtinguha siya paghatag og kahigayonan nga makatubo ang lubi nga lingkawas sa awong. May pagbati siya nga kun kahatagan ang maong tanom og kagawasan gikan sa awong makita ang dakong kapuslanan niini sa kinabuhi sa tawo.

Gisugdan niya pagpuril ang mga sagbot sa maong dapit. Giuna niya pagputol ang kahoy nga maoy nakahatag og dakong kadaot sa tinuboan sa lubi. Ang lubas niini wala makasugakod sa kahait sa iyang pinuti. Napukan kini ug mihagsa sa kilid sa pangpang.

Apan mitingkag ang iyang mga dalunggan. Misibaw sa palibot ang tiliis nga tingog sa usa ka mananap nga daw nalisang. Mihangad siya sa gigikanan sa tingog. Maoy iyang nakita ang aliwas nga unggoy nga milayat gikan sa pangpang paingon sa dakong punoan sa kahoy. Nagbahis kining milataylatay sa mga sanga sa kahoy. Unya siga kaayo’g mga mata ang mananap nga midungaw ngadto kaniya. Ingon sa nasuko ang unggoy nga iyang giputol ang kahoy nga nakahatag og awong sa lubi.

Ang unggoy abtik nga mitaboktabok sa mga sanga sa kahoy palayo kaniya. Kadali ra kining nahanaw sa iyang panan-aw. Nakapanglingo siya. Sa tinawo niyang pagsabot ang unggoy wala makatugkad sa iyang gihimo. Malagmit nagtuo ang maong mananap nga gipasipad-an niya ang lasang. O kaha natugaw niya ang malinawong pagpahulay niini. Apan dili kini ang iyang tumong. Buot lang niyang purilon ang mga sagbot nga nakahatag og sagabal sa pagtubo sa lubi, ang labing mapuslanong tanom nga iyang nakita sa naangkon niyang kalikopan. -- Sumpayan pa