Classmate

Gula 2

“Gaw mosayaw ko, kanang babaye nga porma kaayo’g lawas nga nagkarsones og maong ug nag-T-shirt og red maoy akong sayawan,” giingnan ni Oscar ang usa niya ka ig-agaw.

“Ayay, wala man g’yud ang-anga nimo gaw, gwapa man g’yud ang imong tirada. Classmate bitaw nimo na sa grade six gaw, si Jocelyn,” nagkatawa ang ig-agaw ni Oscar. “Mao ba?”

Sanglit mikalit ra man og sikat si Oscar sa maong baylehan, siya ang nahimong sentro sa mga mata sa tawo. Mipagakpak ang mga tawo dihang mibayle na siya niadtong babaye nga iyang nakursonadahan.

“Sikata na nimo ron Oscar uy! Unsay trabaho nimo sa ciudad?” ang babaye maoy unang nakigsulti kang Oscar. Mikatawa si Oscar ug gitutokan pag-ayo ang babaye kay wala na g’yud siya makaila niini.

“Gwapaha na nimo ron Joy uy,” walay lipod-lipod nga giingnan ni Oscar ang kanhi niya classmate. Gihandom kadiyot ni Oscar kadtong mga panahon nga kaklase pa sila si Jocelyn.

Dihay higayon nga nakahilak si Jocelyn tungod sa iyang kasungogan. Wala siya makalimot nga samtang gisugo sila sa pagpanilhig sa playgrounds, gikalitan niya’g walis ang sayal ni Jocelyn.

Hapit na niadto ang closing sa eskwela ug mao nga wala gayud si Oscar makapangayo og pasaylo hangtud nga dinhi na siya magpuyo sa iyang uyoan sa dakbayan sa Sugbo.

“Nganong naghinuktok ka man?” nahibulong si Jocelyn nga layo kaayo’g panan-aw si Oscar. “Aw, gihandum nako kadtong nagtungha pa ta sa elementarya nga nakasala ko nimo Joy. Kadtong giwalis nako ang imong sayal. Sori ha.”

Nagkinataw-anay silang duha. “Gikalimtan ko na kadto uy, mga bata pa man ta niadto,” matud ni Joy.

Kadto maoy sinugdanan sa panagsuod nila pagbalik. Gisayawan pag-usab ni Oscar si Joy. “Kinse ka adlaw ang akong bakasyon Joy, anhi ko dinhi mamasko, bisita unya ko sa inyong balay ha?”

“Sure…welcome kaayo ka,” ni Joy pa. Nagngisi si Oscar nga mibalik ngadto sa duha niya ka ig-agaw. “Swerte ka g’yud og sugton ni Joy gaw kay daghan ang nanguyab ana dinhi pero wala pa g’yuy gisugot.”

“Ubani ko ninyo gaw, ihatud nako si Joy pagpauli. Mao ba gihapon ang ilang balay kadtong nahimutang kilid sa bungtod?” ni Oscar pa nga nangutana sa iyang ig-agaw.

Subli nga gisud-ong ni Oscar ang kaanyag ni Joy nga naglingkod sa lingkoranan ubos sa hayag kaayo nga suga. “Gwapa na g’yud kaayo si Joy nga kaniadto akong napahilak sa komedya,” matud ni Oscar sa iyang huna-huna. (Sumpayan)