Maunongon Ang Gugma

Gula 96

Ang iyang mga mata didto gipunting sa bukana sa baba sa langob.

Mipaduol sila si Brandon sa baba sa langob. Duha sa iyang mga sakop ang gimandoan niyang maoy mouna pagsulod.

Apan nakugang si Brandon. Milanog ang mga butobuto gikan sa sulod. Misiga ang iyang mga mata nga nagtan-aw sa duha niya ka sakop nga nahagba sa yuta. Ang usa naigo sa may agtang ug ang lain naigo sa dughan. Pulos wala nay mga kinabuhi ang duha.

“Punyeta!” Nakapamalikas si Brandon.

Nasuta niya nga maglisod sila pagsulod sa langob. Sa higayon nga may mangahas kanila sa pagsulod, dili kini santohon sa armas ni Jeffrey. Hingigo kaayo si Jeffrey.

“Genteroy,” gisangpit niya ang polis nga ilang kuyog. “Sudla sila si Jeffrey sa langob nga ilang gitagoan.”

“D-dili ko, Boss,” miluspad si Genteroy. ‘Dilikado kaayo.”

“Diay?” Malagoton nga mition si Brandon sa gigunitan niyang armas ngadto sa polis. -- Sumpayan pa