Balik sa gibiyaan nga kalibotan

Nahiagom sa dakong kadaot ang iyang mga tiil. May mga tunok nga mipungon sa iyang mga lapalapa. Nunot sa paghunas sa kakutas maoy mibanos pagtaob ang kangulngol sa iyang mga pangos. Kaganina sa iyang pagdagan, wala siya makamatngon nga nasamad siya. Maoy mipasulabi sa iyang galamhan ang kalisang sa mga putyokan nga mapungtanong migukod kaniya. Seguradong kuninitan gayod siya sa namungot nga mga mananap kun magpatara lang siya sa iyang kaugalingon. Mora siya’g nakaukab sa kahon ni Pandora. Ang maong hitabo makapahinuklog kaniya. Dihay laing tabil nga natukas sa iyang hunahuna. Miamag ang kahiamgo nga bisan sa ilang kagagmay ang mga mananap maantigo usab nga manimalos sa nagpasipala kanila. Maghiusa sila sa ilang kusog aron pagpahamtang sa ilang kabangis kun pasipad-an ang ilang katungod sa pagpakabuhi ug tugawon ang malinawon nilang pagpuyo. Unsa na kaha ang tawo kun maoy panamastamasan? Milugdong kining maong kamatuoran sa iyang kaisipan.

Ang maong kahiamgo kalit lang nahisama sa abog nga gitapdas sa hangin sa iyang hunahuna. Mibanos ang uylap sa kasakit sa iyang mga samad. Dihay ngislo nga miaslay sa iyang panagway.

Gihubo niya ang nagusbat niyang sapatos. Gilugit niya ang mga basuni sa tunok nga mitaop sa lapalapa sa iyang mga tiil. Human maibot ang mga tunok, nagtakiang siyang naglakaw yuhot sa kasagbotan. Nangutlo siya’g mga dahon sa kandingkanding. Iya kining gidukdok ug gipuga ang duga niini sa iyang mga samad. Ingon sa maguba ang iyang nawong sa gibating kahapdos. Apan giantos niya ang kasakit.

Inanay nga mitang-on ang dugo. Nag-anam og kadumpol ang mga kuko sa kahapdos. Misibog ang kasakit. Iyang gitibawas ang pagtambal sa iyang mga samad. Ang dinukdok nga mga dahon sa kandingkanding iyang gihampol sa mga bun-og ug pangos sa iyang mga tiil. Gikanlat niya ang sidsid sa iyang sinina. Ang maong bahin sa iyang sapot gibaat niya aron dili mataktak ang gihampol nga tambal sa iyang mga samad.

Nagtakiang siyang mibalik sa payag. Nagdahik siyang misaka sa hagdanan. Taudtaod siyang milingkod sa salog duol sa may pultahan. Gipamatyag niya ang iyang mga samad. Dayon mihigda siya. Tungod ba kaha sa mga bun-og nga nahiagoman, nahikatulog siya sa maayong paghinanok. -- Sumpayan pa