Maunongon ang gugma

Daghan na man gud ang nagtambayayong sa pagpangita kang Jeffrey. Mga sakop sa NBI, CIDG, CIIB ug uban pang grupo ang nagpangita kang Jeffrey human makompirmar nga ania ra kini magtagotago sa Sugbo.

Kinahanglan nga siya’y makadakop kang Jeffrey. May order na ang ilang labaw sa PRO-7 sa pagdakop kang Jeffrey patay o buhi. Dili siya buot nga may daotang mahitabo kang Jeffrey mao nga gusto sa koronel nga siya’y makadakop niini.

Human maandam ang tanan, migikan dayon ang grupo ni Col. Noot paingon ngadto sa Dalaguete.

Nakabantay si Jeffrey sa pagsingabot sa grupo ni Brandon Mercado sa dapit nga ilang gitagoan. Midali sila si Danica sa pagbiya sa payag. Didto sila mopaingon sa usa ka langob.

Apan gisundan sila sa grupo ni Brandon hangtod sa langob. Mitago sila si Jeffrey ug Danica sa dagkong mga bato sa sulod sa langob. Mipasalipod sila’g maayo.

“G-giunsa man nila pagkasayod nga nia ta dinhing dapita magtago?” Nakapangutana si Danica nga gikumhan sa kahadlok.

“May nakataho tingali kanila nga nia kita niining bukira,” tubag ni Jeffrey dungan ang paglanit sa armas gikan sa iyang hawakan. -- Sumpayan pa