Eusebio bangkil

Lagas na ang kamaisan ni Sebio o Sebio Bangkil. Kugihan kini siya nga pagka-ulitawo kay bisa’g duna pa siya’y laing trabaho isip trabahante sa usa ka construction sa project ni Engr. Dokoy wala gyud niya biyai ang iyang pagtikad sa yuta.

Dinhi sa sityo Dulom-Gutom ang gitikad nga uma ni Sebio maoy labing lapad ug labing suwerte sa tanang mga uma dinhi sa ilang sityo. Gani, ingon sa gibati pud og hilabihang kasina sila si Inok, Pater, Minggoy, Natong sa ilang nasaksihan sa paglipang sa mga tanom ni Sebio nga mga mais ug labi pa sa iyang mga lagutmon.

Tungod niini, dunay gibuhat nga dili maayo ang iyang mga silingang mag-uuma kay gibutangbutangan siya’g tabi nga si Sebio usa ka mangtas nga ungo. Way gipili kuno si Sebio kun mao nay gutmon kay mobalbal bisa’g unsa diha ma-tawo man o ma-hayop iya gyud kining balbalon aron kuno katambalan ang kauhaw niini sa dugo.

“Di ko motuo ana, uy,” ni Isyang pa nga mora’g milaban kang Sebio. “Ungo gud tawon, di na ungo si Sebio, uy. Pataka lang mo’g sulti da, Inok ug Pater...”

“Mangtas lagi na siya, kakita ka anang iyang bangkil nga labihang taasa, unya moingon ka nga di ka matuo...” mora’g gipalabian na gyud og daut ni Pater si Sebio. “Diha gani kausa nga nakita nako nga may dugo ang iyang baba ug may lama pud sa dugo ang iyang sinina dapit sa dughan ug pagka-hapon nakit-an nila ang kabaw ni Otyong nga patay na, nagtikangkang didto sa may kabugangan nga patay na...”

“Dili lagi ko motuo anang inyong pasangil. Pangdaot man na sa inyong isig ka tawo,” mora’g mihinay og gamay ang tingog ni Isyang. Kini si Isyang usa sab ka dalagang guwang samang Sebio ug may hilom siyang pagbati sa ulitawong guwang tungod lagi sa pagka-kugihan niini. Gani, tuyoon na man ni Isyang nga moadto gyud siya sa payag aron mangayo ni Sebio og mais anagon. Hatagan sab dayon sa ulitawong guwang ang dalagang guwang ug unya magpadugaydugay pa gyud kini sa pagpauli. Pero, si Sebio Bangkil ingon way nahitabo nga mora’g wala kasabot sa gipakitang lihok sa dalagang guwang. Unya...

“Kuan ba, Bio, ikaw no ila laging gitumotumoag istorya nga mangtas kuno ka ungo ug daghan na kuno ka’g gibalbal dinhi sa atong lungsod,” mipahayag si Isyang.

Inay masuko mipahiyom hinuon si Sebio ug mitingsi ug nadayag ang tag-as niyang mga bangkil. “Tuo sab ka ana, Isyang?”

“Dili, uy, tuo gud tawon,” hinay ang tingog ni Isyang nga ingon sa nakalitan nga nagtan-aw sa bangkil ni Sebio nga midayag. Tag-as ug mora’g lansang ang porma niini. Hesus Maria Husep! ni Isyang pa sa hilom.

“Isyang, duna man koy nadiskubrihan nga usa ka ungo dinhi sa ato ug siya maoy manuyop og dugo sa mga hayop dinhi sa ato, ug dili madugay dugo na sa tawo ang suyopon niini...” kalma nga namulong si Sebio. “Tinuod nga tag-as ko’g bangkil apan dili ko ungo...”

Pagka-gabii nagubot ang mga tawo kay may nasakpan kunong usa ka ungo ug si Sebio ang nakadakop. Nanapok dayon ang mga lumolupyo aron ilang tan-awon kun kinsa gyud ang mangtas nga ungo.

“Sige na, kuhaa na ang gitabon sa nawong anang ungoa!!” singgit sa mga silingan.

Gitukas ni Sebio ang sako nga iyang gitaptap sa nawong sa ungo ug nakurat sila nga dili makatuo kay si Pater man ang mangtas. Nanglingkaang ang mga buhok niini ug mora kini’g usa ka iro nga laksot na kaayo ang nawong ug nanggawas pa ang iyang bangkil.

“Kun mao na si Pater ang mangtas nga ungo dinhi sa atong dapit ug dili si Sebio!” dihay misinggit nga silingan.

Dihang gidala sa mga polis si Pater paingon sa munisipyo aron bilanggoon kalit lang kining mihunat paglukso ug kalit lang nahanaw sa kangitngit sa kagabhion.

“Ayaw lang kamo kabalaka kay kadto siya molayas na gikan dinhi sa atong dapit,” ni Sebio pa nga seryoso ang nawong. “Tungod sa akong orasyon pangontra sa mga ungo di na to mobalik dinhi sa ato.” (Kataposan)