Mapinanggaon

Dear Tita Salie,

Have a nice day, Tita. Just call me Shella, 20 years of age. Taga Masbate City ug usa ka dalaga.

I have a boyfriend, Tita ug mag one year na ang among relasyon. Usa siya ka sundalo ug 35 years old na siya. Minyo siya apan bulag na siya sa iyang asawa ug duna sila’y duha ka mga anak nga anaa sa akong boyfriend karon.

Buotan baya siya, Tita ug mapinanggaon pa kaayo sa iyang mga anak. Ganahan baya ko magtan-aw nila nga magkuyog ug mora’g mosamot ang akong gugma kaniya nga magtan-aw nga caring ug loving kaayo sa mga bata. Basta mouli siya sa ilaha iya gyud dayon hatagan og panahon ang iyang mga anak. Ug nasayod ko nga kun magkadayon ming duha pinangga usab ako niya ug ingon man ang among umaabot nga anak.

Maayo kaha nga akong ipadayon ang akong gugma niining lalakiha, Tita, bisan kun duna na siya’y mga anak? Dugay na sad silang buwag sa iyang asawa, puyde na kaha kaming magkadayon? Palihog hatagi ko sa imong hunahuna ug pasabta ko, Tita. Thank you very much and more power.

* * *

Dear Shella,

Usa sa mga timailhan nga makaingon kita nga buotan ang usa ka lalaki kun siya mahiligon ug mapinanggaon sa mga bata. Sa pamilya, atong makit-an kun responsable ug mapinanggaon ang usa ka amahan kun siya duol o close kaayo sa iyang mga anak.

Apan usa ka mohimo og hukom mahitungod nianang butanga angay usab imong masayran kun nganong wala molungtad ang iyang kaminyoon. Suwayi og pangutana kun nganong nagbulag sila. Tingali kun wala kaagwanta ang iyang kanhi asawa kay panagsa na sila magkita ug atoa nadestino sa layo ang iyang bana. Ikaw kaha makaya ba nimo nga panagsa ra nimo siyang ikauban kay kanunay’ng atoa sa trabaho?

Matud pa sa uban, daghan kuno og babaye ang mga sundalo. Dili ka kaha kanunay magduda kaniya ug mao unyay kanunay’ng hinungdan sa inyong away. Dapat before ka maghunahuna sa pagpakigminyo niining tawhana imo unang tan-awon ang imong kinabuhi sa umaabot kun kaya ba nimo kining puy-an.

Dapat usab ninyong hisgotan kun unsay iyang plano sa iyang unang kaminyoon aron inyong malikayan ang mga suliran. Kay tingali unya kun mobalik ang iyang asawa ug maghasol kaninyong duha. Ug sa inyong umaabot nga pamilya. -- Tita Salie